Ikasturte bukaerako ikuskizunak taularatuko dituzte datozen egunotan Antxon eta Trintxerpen.
![Badia Eskola](http://oarsoaldea.hitza.eus/site/files/2016/06/emanaldian2.jpg)
Ikasleak Gabonetan egin zuten jaialdian.
Hemeretzi talde ditu Badia Eskolak Pasaian, guztira, 170 antzezle txiki. Guzti-guztiak ikasturtean zehar landutakoa herritarren aurrean aurkezteko aukera izango dute ekainean zehar. Bi astez, Antxoko kultur etxeko eta Trintxerpeko alkateordetzako oholtzetan ariko dira.
“Sorgindutako etxaldeak, behar ez duten tokira iritsi diren bidaiariak, iragarki bat grabatzeko arazoak, ipuinak espero ez dugun modu batera kontatuak edo zirku bat…” denetarik aurkituko du ikusleak antzerki ikasleek taularatuko dituzten istorioen artean. Talde lanean oinarrituta, jolasaren bitartez eta irakasleen laguntzaz, ikasleek beren kabuz sortutako lanak dira guztiak.
Hilaren 6an, 7an eta 8an Antxoko kultur etxean izango dira emanaldiak, eta hilaren 13tik 16ra berriz, Trintxerpeko alkateordetzan, egunero, 18:30etik aurrera.
Datorren ikasturterako izen-ematea
Emanaldi egunetan, datorren ikasturterako Badia Eskolan plazak erreserbatzeko aukera egongo da. Aretoetan bertan izen-emate orria beteta eman ahalko da izena, edo hilaren 20tik 30ra bitartean 617 81 99 81/667 400 641 telefono zenbakietara deituta.
Badia Eskolak talde eta ikasle kopuru mugatua du eta eskolako arduradunek ohartarazi dutenez, datorren ikasturtean eskolaz kanpoko taldeei emango diete lehentasuna, eskolaz kanpo, “hizkuntza eta elkarlan dinamikak aberasgarriagoak direla” sinetsita.
Antzerki tailerrez gain, datorren urtean dantza garaikidea ere eskainiko dute, astelehenetan, 17:00etatik aurrera, Antxon.
Antzerkia, ostegunetan izango da Antxon, 17:00etatik aurrera, haur eta nerabeentzat.
San Pedroko eta Trintxerpeko haur eta nerabeek, azkenik, asteazkenetan izango dute antzerkia egiteko aukera, 17:00etan.