Bigarren itsasontzia Pasaia-Amberes biderako
Udatik aurrera Britainia Handira ere iritsiko da edukiontzien garraiorako linea.
Ostiraletik aurrera Capella itsasontzia Pasaia eta Amberes arteko linean hasiko da lanean, Portu Agintaritzak gaur jakinarazi duenez. Zerbitzu berria ostiraletan aterako da Pasaiako portutik eta astelehenetan iritsiko da Amberesera. Modu honetan ostiraletan Amberesetik atera eta astelehenetan Pasaiara iristen den egungo itsas-linea osatuko du zerbitzu berriak.
Edukiontzien garraiorako linea da Pasaia eta Amberes artekoa, eta 30 enpresatik gora erabiltzen dute astero. Horregatik TKN Shipping Line armadorearen asmoa da, udatik aurrera Erresuma Batuan astean behin eskala bat egitea da, “bere bezeroen eskariei erantzun asmoz”.
Potentzial handikoa
Denbora gutxi du funtzionamenduan edukiontzien garraiorako lineak Pasaian. Iazko apirilean irten zen lehen merkantzia ontzia Pasaiatik Amberesera. Terminalean 3.816 edukiontzi mugitu dituzte aurten urtarrila eta maiatza bitartean. Kopurua ez da oraindik handia, baina Portu Agintaritzak nabarmendu duenez, edukiontzien trafikoa hilero % 10 hazten ari dela kontuan hartuz gero, hazkunde horrek lineak potentzialtasun handia duela eta inguruko industriek beharra dutela erakusten du.
