Ostiralean, bandako musikariak ez dira bakarrik izango, Miren Urbieta-Vega sopranoa izango da agertokian ahotsa jartzen.
Mitxelena, Collar, Urbieta-Vega, Ayerdi, eta Lopez Etxezarreta.
Opera eta Zarzuela errezitaldia antolatu du EMKEren Musika Bandak ostiralerako. Eta bandako musikariak ez dira bakarrik izango, Miren Urbieta-Vega sopranoa izango da agertokian ahotsa jartzen.
Gaur eman dute emanaldiaren berri, Josu Mitxelena EMKEko presidenteak, Ion Collar Kultura zinegotziak, Miren Urbieta-Vega sopranoak, Alain Ayerdi bandaren zuzendariak, eta Garzi Lopez Etxezarreta zinegotziak. Fatima andra Mariaren parrokian izango da kontzertua 20:30ean hasita eta bertaratzen direnek, Verdi, Puccini, Guridi eta Mascagniren lanak entzuteko aukera izango dute, besteak beste.
Urbieta-Vega sopranoa, proiekzio handiko abeslaria dela esan du Mitxelenak, eta bera izango dela ostiraleko kontzertuaren protagonista gaineratu du. Lehenengo aldiz joko du bandak solista batekin, eta horrek moldaketa handiak eskatzen dituela esan du Ayerdik, “horretarako hilabete eman dugu entseguak egiten, bata besteari ohitzen eta uste dut, ostiralekoa emaitza polita izango dela”. Operarekiko harremana estutu duela bandak aurten gaineratu du zuzendariak, “Opus Lirikaren Traviatan parte hartzeko aukeraizan genuen, eta orain ere operara hurbilduko gara”. Urbieta-Vega beraiekin izatea “plazerra” dela gaineatu du Ayerdik.
Urbieta-Vegak eskerrak eman dizie bandari eta udalari “eskainitako aukeragatik”. Izan ere Donostiarra bada ere, urte batzuk daramatza Erreteria-Oreretan bizitzen sopranoa, “etxean eta halako kalitatea duen banda batekin abestea oso polita da”. Malgutasun handiko banda dela EMKErena, eta abeslari batentzat erronka dela banda bateki batera aritzea gaineratu du. Erronkarik handiena, halere, interpretatiboa izango da Urbieta-Vegaren hitzetan: “Oso sentikorrak diren piezak, komikoak direnekin lotu ditugu errezitaldirako. Oso ikusgarria eta dibertigarria izango da”.
Musika Bandakren lana eskertu du Lopez Etxezarretak eta Collarrek eta herritar guztiak animatu dituzte ostiraleko ikuskizunarekin bat egitera. Sarrerak bost euroan salduko dituzte (bazkideentzat doan da) Niessen Kulturgunean eta kontzertuaren egunean bertan parrokiaren sarreran.
