Itsas Mendiren Ibilaldi Neurtua, igandean

Iaz bezala, aurten ere, ibilaldi laburra eta luzea izango dira aukeran.

olatz mitxelena

2016/06/15

Aurreko edizio bateko parte hartzaileak.

Igandean egingo da Pasai Donibanen Itsas Mendik antolatutako 46. Ibilaldi Neurtua. Bi ibilbide izango dira aukeran; luzea eta motza. Irteera 08:00etan izango da ibilbide luzea hautatzen dutenentzat; bikoteak iritsi ahala irtengo dira, Itsas Mendi elkartearen egoitzatik. Ordubete beranduago, 09:00etatik aurrera hasiko dira irteten ibilbide motza egiteko izena ematen duten bikoteek, toki beretik. Bi ibilbideek bat egiten dute irteeran eta helmugan. Aldea, Jaizkibelgo goialdean da. Lehengo dorrearen altueran, ibilbide motza egingo dutenek bidezidor bat hartuko dute kantinarantz, jaitsieran berriz ere ibilbide tradizionalarekin –luzearekin– bat egiteko. Parte hartzaileek ibilbidean zehar topatuko dituzten baserrietan jaso beharko dituzte beren denborak. Izan ere, ohi bezala, Donibaneko garai bateko baserrietatik zehar doa ibilbidea. Horietako asko egun eraitsita daude, eta horregatik antolakuntzak plakak kokatuko ditu, parte-hartzaileek ikus ditzaten. Plaka horietan, 1936. urtean Ixidoro Olaziregi ‘Ikur’-ek idatzitako bertsoak grabatuta daude. Bertsoek baserriak deskribatzen dituzte. Kontrol guneetan edariak izango dira, eta atsedenaldia bat ere izango da, hamaiketakorako. Izen-ematea doan da eta egunean bertan egin behar da. Irteeran motxilak uzteko aukera izango da. Helmuga Santiago plazan kokatuko dute, eta han edariak eta mokaduak banatuko dizkiete parte hartzaile guztiei. Sariak banatuko dituzte han bertan bikote denak helmugaratu ondoren, eta Pari Berri jatetxean bi lagunentzako afaria zozkatuko dute. Aurten, baina, ez da izango barrikoterik.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.