Badiaren bueltan dena prest da udako solstizioa ospatzeko
San Joan sua piztuko dute bihar Antxon, Donibanen eta Trintxerpen.
Uda hasi berri da, eta Pasaian urteko gaurik motzena ospatzeko ekitaldiak antolatu dituzte herritarrek.
Antxon, Alkartasuna Dantza Taldeak antolatu du ospakizuna. Urtero legez, hilaren 23an, 22:30ean piztuko dute sua, Gure Zumardian, eta soka dantzan emango diote ongi etorria udarari. Alpargata eta Urdiain ere dantzatukoko dute emakume eta gizonek suaren bueltan. Dantza taldeak entsegu irekiak antolatu ditu, bi dantza horietan trebatu nahi duten herritarrentzat. Herenegun izan zen lehen entsegua, eta gaur egingo dute bigarrena eta azkena (hilak 22), 20:30ean, azokan.
Donibanen, barrutiko jaiak hasi eta berehala piztuko dute sua, 21:00ak inguruan, Santiago plazan. 20:45ean, Konstantzia Musika Bandak San Joan martxa joz egingo du plazatik elizaraino arteko bidea, eta ondoren piztuko dute sua. Donibanen ere suaren bueltan dantzan ospatuko dute udararen hasiera.
Trintxerpen, goiztiarragoak izango dira. 20:00etan piztuko dute sua, Gudarien Enparantzan. 25 bikote dantzatuko dira zuhaitzaren inguruan. Illunbe Musika Elkartean antolatu du sua.
San Pedron, oraingoz, ez dirudi aurten San Joan sua egongo denik.
