Emakumeen Etxearen adreiluak jartzen hasiko dira

Emakumeen Etxearen gaineko hausnarketa egiteko parte hartze prozesua abiatuko du udalak, Elhuyakin. Uztailaren 6an eta 13an izango dira saioak.

Ikerne Zarate

Errenteria-Orereta

2016/06/24

Lopez Etxerreta gaurko agerraldian.

Emakumeen Etxea izango du Errenteria-Oreretak. Legealdi honetan izango da, udalak horretarako konpromisoa hartu baitzuen, eta eraikinaren kokapena ere zehaztuta dago, Txirrita parkeak (Patxiku zelaia) hartuko du. Herriko emakume talde, feminista eta norbanakoak mahaiaren bueltan eseri eta etxe horrek zein funtzio izango duen eta nola kudeatuko duten erabakitzea da gakoa orain. Horrela jakinarazi du Garazi Lopez Etxezarreta Berdintasun zinegotziak, eta hausnarketa hori egiteko, sei hilabete iraungo duen parte hartze prozesua abiatuko duela udalak Elhuyarren aholkularitzarekin jakinarazi du. “Elkarrizketak egin ditu Elhuyarrek herriko hainbat emakume talde, eta norbanakorekin. Horiek aintzat hartuta, diagnostikoa egin du. Orain, mahaiaren bueltan eserita egitasmoa landuko dugu”. Bi saio egingo dituzte horretarako datorren hilabetean, uztailaren 6an eta 13an, zehazki Merkatuzarren 18:00etatik 20:30era biak. Eta horietan ahalik eta emakume gehien bildu nahi dituzte “guztien artean Emakumeen Etxearen oinarriak finkatzeko eta hausnarketa kolektiboa egiteko”. Egitasmoaren gaineko gogoeta eta aukeren gaineko hausnarketa egingo dute biltzen direnek. Parte hartzea erraztu asmoz, haurtzaindegi zerbitzua eskaini du udalak jardunaldiak egiten dituzten bitartean. Interesdunek hiru egun aurretik egin beharko dute eskaera 943 44 95 76 telefono zenbakian edota posta elektronikoz. Donostian erreferentea Errenteria-Oreretan eraikiko den Emakumeen Etxea Oarsoaldeako lehena izango da. Hurbileneko esperientzia Donostiakoa da, “anbizio handikoa Gipuzkoa ia osoari erantzuten diolako”, esan du Lopez Etxezarretak. Arrasate eta Hernanin ere badira Emakumeen Etxeak. Lopez Etxezarretak, emakume guztiak deitu ditu hausnarketarekin bat egitera, “garrantzitsua delako guztiok gure ekarpenak egitea”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.