Harresirik Gabeko Lurraldeak proiektua martxan dago. Migranteen baldintza txarren aurkako sentsibilizazio kanpaina da. Lampedusara joango dira ere.
[Ilustrazioa: Isabel Mancebo Balda]
Itaka uhartera iristeko ametsa zuen Ulisesek. Bertara iristeko desioak mugitzen zuen Ulises, eta uhartera iristea baino, ordura arteko bidaia —odisea— zen garrantzitsuena, ametsa piztuta mantentzen zuelako.
Mediterraneoan ere dago Lampedusa uhartea. Gaur egun bertara iristen diren askorentzat, Ulisesentzat ez bezala, bidaia ez da garrantzitsuena, euren jatorriko herrialdeetan bizi duten miseria eta gerratik ihes egitea baizik. Askok ez dute Lampedusara iristea lortzen.
Lampedusa sinbolo bezala hartu dute Harresirik Gabeko Lurraldeak proiektuko kideek. Mikelazulo Elkartean sortu zen proiektua, iazko Herrien Astean egindako Lampedusaren mosaikoaren ondoren. “Zerbait mamitsuagoa” landu behar zuten, eta pixkanaka proiektua garatzen hasi ziren. Lampedusara bertara joateko ideia ere otu zitzaien.
Proiektuko kideentzat bai, Lampedusa Itaka bezalakoa da. Abuztuan joango dira Italiako administraziopean dagoen uhartera. Hala ere, ez da hori helburua, migrazio ez-natural fenomenoari buruz sentsibilizatzea baizik. Horrekin batera, Asian Dub Foundationek abesten zuen Fortress Europe (Europa Gotorlekua) salatu nahi dute.
Europako harresiak botatzen hasteko kanpaina apirilaren 18an abiatu zuten, Lampedusara bidean zihoan itsasontzi bat hondoratu eta 700 etorkin hil zirela salatzen zuen elkarretaratzearekin. Oarsoaldeko 50 eragilek bat egin zuten ekitaldi eta manifestuarekin. Egun horretan bertan beste ehunka etorkin hil ziren modu berean.
Ekonomia eredua errudun
Egitasmoko kideek herrien nortasunak aldarrikatzen dituzte, ezaugarri batekin: “Herri batek ez du harresirik behar. Harresiak eraikitzea sistema ekonomikoak behartzen du”.
Hainbat ekitaldi egin dituzte orain arte. Esaterako, herenegun Zaria Koru Eskolak kontzertua eman zuen Fatimako parrokian. Datorren asteartean, berriz, EMKEko musika bandak kontzertua emango du Niessenen, 20:00etan, Badut antzerki taldearekin batera.
Beste hainbat eragilek ere Harresirik Gabeko Lurraldeak-en ateak jo dituzte, eta hainbat kultura jarduera egin —eta egingo— dituzte proiektua babesteko. Kamisetak ere salgai daude elkartearen egoitzan.
“Ez da karitatea”
Abuztuan joango dira Lampedusara, eta bertako Askavusa elkartearekin jarri dira harremanetan. Etorkinei laguntza praktikoa emateaz gain, irlaren militarizazioa ere salatzen dute.
Antzeko helburuekin joango dira proiektuko hamahiru lagun: “Elkartasuna bai, baina azaleratu nahi dugu azpian dagoen problema. Arazo hori da Europak duela errua, nahiz eta beraiek ez onartu. Han sortzen ari den gerra eta miseria zein aldaketa klimatikoak sortzen ditu milioika immigrante”. Europaren erantzuna ere salatu dute:?”Frontex da, mugak itxiz. Eta sartzen direnei islamofobia, CIES, paperik ez ematea eta abar da soluzioa. Melilla, Calais edo Idomeniko egoera ere lehen planoan jarri nahi dugu”.
Horrela, eta bidaia helburua ez dela argi uzteko, han bizi eta sentitutakoa kontatuko dute hona itzultzean, bakoitzak bere erara. Izan ere, aktoreak edo ipuin kontalariak daude proiektuaren barruan.
Lampedusa da sinboloa, baina Europako beste mugen errealitatea ere ezagutarazi nahi dute. Idomeni, Melilla edo Calais eremuak “erabat militarizatuta” daudela salatu dute Harresirik Gabeko Lurraldeak proiektuko kideek. Azaroan toki horietako errealitatea kontatzeko muga diren herri horietako biztanle batzuk gonbidatuko dituzte.
Orduan bukatuko da kanpaina. Harresiak guztiz botatzeko lan handia dago egiteko, baina adreiluak hasi dira pixkanaka kentzen.
