Jai batzordeak atzo egi zuen agerraldia aurtengo madelenen berritasunak jakinarazteko.
Jai batzordeko kideak aurkezpenean.
Jai batzordeak atzo egi zuen agerraldia aurtengo madelenen berritasunak jakinarazteko. Txupinazoari, haurren txupinazoa batu bazitzaion, aurten lehen aldiz
Holi Txupinazoa egingo dute. Hori berritasun nabarmenena jai batzordeko kideek jakinarazi dutenez: “Jaiei hasiera emateko modu berri bat izango da”. Gazteen jai batzordean sortu zela ideia azaldu dute, jatorria Indian duena, “koloreetako hautsak erabilita, kultur aniztasuna, errespetua, tolerantzia eta bizi poza bezalako baloreetan oinarritutako festa izango dugu”.
Hortaz txupinaoa bizitzeko hiru modu eta hiru eremu izango dira hilaren 21ean. 17:30ean Mila Koloreko haurren txupinazoa izango da Koldo Mitxelena plazan eta ordubete beranduago berriz, Holi Txupinazoa Gernika plazan. Azkenik 19:00etan jaurtiko dute jaiei hasiera emango dien txupina udaletxeko balkoitik. Herriko plazan, Zumardian jarriko duten pantaila erraldoian edo Herri Bizia webgunearen bidez jarraitu ahalko da azken hori.
Hilaen 21ean antolatu duten herri bazkarian parte hartzera deitu dituzte, bestalde, herritar guztiak. Herriko plazan izango da 14:00etan eta txartelak hilaren 6a arte eskura daitezke. Bazkalostean, 18:30ean Txapeloaz dantza egingo dute, eta hori ikasteko entseguak egingo dituzte aurretik. Hilaren 7an, 14an, 18an eta 20an izango dira Niseengo balioanitz aretoan 19:00etan.
Asteartean aurkeztuko du udalak jai egitaraua. Bertan hilabete hauetan auzolanean landu dituzten ekintzak islatuta daudela esan dute jai batzordeko kideek, “jaiak herritik eta herriarentzat izango dira aurten ere”.