Andra Mari Abesbatza izango da aurten omendua, eta beraiek piztuko dute jaiei hasiera emango dien suzia.
Ruiz, Karrikiri, Collar eta Oiarbide.
Gero eta hurbilago dira madalenak eta udal korporazioko kideek gaur aurkeztu dute jai batzordeak bost egunerako prestatu duen
egitaraua. Ion Collar Kultura zinegotziak, Jaione Karrikiri (EH Bildu), Iñaki Ruiz (PSE-EE9 eta Garbiñe Oiarbide (EAJ) izan dira aurkezpenean eta Collarrek eman ditu xehetasunak. Andra Mari Abesbatza izango da aurten omendua, eta beraiek piztuko dute jaiei hasiera emango dien suzia. 1966an Jose Luis ansorenak sortu zuen abesbatza “munduan zehar ibili da sariak jasotzen, eta aurten 50 urte bete ditu”, esan du Collarrek.
Horren harira omenaldi xumea egingo diote abesbatzari hilaren 15ean 20:00etan eta bertan madalenetako kartel lehiaketa irabazleari, Angel Blanco Egoskozabal errenteriarrari.
Jai batzordearen lana goraipatu du Collarrek aurkezpenean, “eta eskertu. Aurten 35 elkartetik gora ari dira lanean errespetua, aniztasuna, berdintasunaren baloreak aintzat hartuta bidea egiten”. Aurten hiru txupinazo izango direla aipatu du bestalde, “haurren txupinazoarekin eta txupinazo nagusiarekin batera, Holi txupinazoa egingo dute. Koloretako hautsekin eta musikarekin egingo diete harrera gazteek beraz 19:00etan Gernika plazan”.
Burubeltz
Beste berritasunik ere bada aurtengo madalenetan. Erraldoi eta buruhandien konpartsak kide berria izango du, Burubeltz. Collarrek azaldu duenaren arabera, Aniztasunaren Nazioarteko Egunean ezagutu zuten burubeltz adar handidun aker beltza eta hamaika koloretako jantzia duena.
Musika eskaintzari dagokionean aurten ere publiko guztiarekin pentsatu dutela zehaztu du Kultura zinegotziak egitarua osatzeko garaian eta oholtza gainean izango diren taldeetako batzuk nabarmendu ditu: “Esne Beltza, Raimundo Amador, eta Niko Etxart eta Hapa Hapa izango dira berezienen artean”.
Jai egitarauaren 9.400 ale atera ditu udalak bi formatotan: klasikoa eta eskukoa. Bihartik hasi eta ostiralera arte banatuko dituzte udaletxeko atarian 10:00etatik 13:00etara eta udal eraikinetan ere izango dute herritarrek programa eskuratzeko aukera, “herritar oro eta elkarteak deitu nahi ditugu programa hartzera”. Herri bizia weborritik ere deskargatzea izango da eta sare sozialetan ere jarraipena egiteko aukera izango da nahi duen orok bere bizipenak partekatu edo argazkiak jartzeko, eta horretarako
#madalenak2016 traola erabiltzeko eskatu dute.
