[Argazki galeria] Elkarlana ezinbestekotzat jo du Iñigo Urkulluk Pasaiara egindako bisitan

Lehendakariak Herrerako Euskotren geltokia eta Trintxerpe lotzeko egingo dituzten lanak ezagutu ditu bertatik bertara, eta ondoren Albaola bisitatu du.

olatz mitxelena

Pasaia

2016/07/20

Albaola bisitatu du lehendakariak, eta Xabier Agotek egin dio harrera

“Biziberritze integrala ezingo da gauzatuko erakundeen arteko elkarlanik gabe”. Horixe gaur goizean Iñigo Urkullu lehendakariak Pasaiara egindako bisitan nabarmendu duen ideia. Eta horixe gaurko bisitak utzi duen irudia. Erakunde guztietako ordezkariak lagunduta izan da lehendakaria Pasaian. Ingurumen eta Lurralde Politikako sailburu Ana Oregirekin eta Hezkuntza, Hizkuntza Politika eta Kulturako sailburu Cristina Uriartekin batera etorri da Urkullu. Pasaian izan dira baita ere kulturako sailburuorde Josean Muñoz, Gipuzkoako Ahaldun Nagusi Markel Olano, Donostiako alkate Eneko Goia, Pasaiako alkate Izaskun Gomez, Mugikortasuneko eta Lurralde Antolaketako diputatu Marisol Garmendia, eta Portu Agintaritzako buru Ricardo Peña. Lehendakariak Portuaren Plan Bereziaren onurak goraipatu ditu kaiko Herreran egin duen agerraldian, erabilpen publikorako 8 hektarea liberatuko dituztela berretsiz, eta 5, 5 milioi euro inbertituko dituztela zehaztuz. Portuko sarrera eta irteera urbanizatzeko lanak urtebete iraungo dute; aurtengo udazkenean hasi eta datorren urte bukaerarako amaituta izango direla aurreikusi dute. Trafikoa bideratzeko pasarela bat eraikiko dute, eta oinezkoentzako pasabidea urbanizatu. Inguruan zonalde berdeak aurreikusi dituzte. Albaolara bisita Trintxerpen txalupa hartuta, Albaolako Itsas Faktoriara bisitan joan dira agintari guztiak. Albaolako buru Xabier Agotek egin dio harrera lehendakariari Trintxerpen, eta ondoren Agotek berak gidatu du ontziola barruko bisita, euskara hutsez. Lehendakariak, bere aldetik, Albaolaren lana txalotu du, eta eredugarritzat jo du proiektua. Albaolarena, egitasmo kulturala ez ezik, prestakuntzakoa ere badela goraipatu du Urkulluk, eta bidea emankorra izan dadila opa dio elkarte pasaitarrari.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.