Abuztuaren azken astean Lanpedusara bidaiatuko dute Mikelazuloko kideek. Bertan bildutakoa herritarrak sentsibilizatzeko baliatuko dute.
Joseba Barriolaren azalpenak adi jarraitu zituzten alderdi politikoetako ordezkariek.
Mikelazulo Kultur Elkarteak abiatutako
Harresirik Gabeko Lurraldeak iniziatibarekin bat egin du Errenteriako Udalak. Mikelazuloren mozioa aztertu zuen atzo plenoak eta alderdi guztiek babestu dute. Horren arabera, iniziatibari atxikimendua eta babesa erakutsi dio udalak, eta Melillan, Calaisen, eta Europako mugetan zein Espainiako Estatuko lurraldeetan dauden CIES (Atzerritarrentzako internamendu zentroak) zentroetan ematen diren giza eskubideen urraketak salatzea, eta horien berri herritarren artean zabaltzeko konpromisoa ere hartu du. Iniziatibaren barruan antolatutako jardunaldietan modu aktiboan parte hartzea ere adostu du plenoak.
Iniziatibaren bidez herria sentsibilizatu nahi duela dio Mikelazulok: “Globalizazioaren garaiko migrazioaren fenomeno berriaren aurrean elkartasunjarrera sustatu nahi dugu, gertatzen denaren ulermena landu eta instituzioek daramaten politiken aurrean irizpide propioa eta kritikoa landu nahi ditugu”. Kanpaina joan den apirilaren 18an hasi zuten. Elkarretaratzea egin zuten orduan Lanpedusaren mosaikoaren aurrean eta berrogeita hamar elkartetik gora deitu zuten. bestelako ekimenak ere antolatu dituzte orain arte, eta egingo duten hurrengo urratsa, Lanpedusara joatea izango da. abuztuaren 23an joango dira bertara eta horretarako, harremanetan daude bertako askavusa talde solidarioarekin.
Lanpedusara doaz
“Motxilak kargatuta ekarri nahi ditugu bertatik, ikusitakoa, hitz egindakoa, grabatutakoa, elkarrizketak, informazioa zuzenean jaso eta hori guztia bideo, liburu, emanaldi artistiko edo hitzaldi bihurtu nahi dugu. Ikerketa lana egitera goaz bertara, harresia sentitu, migrazioa ikusi, beldurrak dastatu, sitoriak entzun… eta gure elkartasuna eta salaketa agerian jartzera”.
Lan handiena bidaiaren bueltan helduko den zalantzarik ez dute Mikelazulokoek. bertan ikusi eta ikasitakoa Errenteria-Oreretako jendeari erakutsi nahi diote arte disziplina ezberdinekin eta hitzaldiekin. Melillan, Calaisen, Lanpedusan, Grecia-Macedoniako mugetan ari diren elkarte solidarioekin batzar moduko bat osatu nahi dutela ere jakinarazi dute, “sentsibilizazioari dimentsio orokorragoa emateko”. Topaketa hori azaroan egitea asmoa azaldu dute Mikelazulokoek.
