Andra Mari abesbatzak gaur jasoko du ohorezko oroigarria mende erdia bete duenean. 28 urtez lehendakari izan zuen Ibargureni eskatu dio jaiei hasiera emango dien suziria pizteko
Pello Ibargurenek piztuko du txupina.
Sentimendu handiko gauza bat da. Ez dut beste munduko ezer egin, saiatu naiz ia 28 urteetan laguntzen eta hori egin eta gero niri eskaintzea txupinazoa botatzeko aukera, pozgarria da benetan. Andra Marin familia giroa nagusi izan da, denok egin dugu lan. Jose Luis Ansorena maisua izan da niretzat, eta bera buru izanda, gainontzekoa erraz egin eta lortu genuen, saiatuta.
Txupinazoa botatzeko proposamena egin zidatenean ez nuen baiezkoa eman. Ni bat gehiago izan naiz abesbatzan, eta ez nuela merezi pentsatu nuen. Azkenean baiezkoa eman diet.
28 urtez izan zara lehendakaria.
Hala da. 1968. urtean hasi nintzen. Bi urtetik behin batzordea berritzen zen baina ni ez ninduten berritu, ia 28 urtez jarraian izan naiz bertan.
Zein ekarpen egin dizkio Andra Marik Errenteria-Oreretari?
Andra Marik musika eta abesbatzen mugimenduan ekarpen handia egin du. Gure musikagileek zein lan egin duten bildu dugu Eresbilekin. Horrekin batera, Musikasteren bidez urtean behin 100 urte betetzen dituzten musikariak, gaur egungo musikariak eta zerbait berria egiten dutenak ekartzen ditugu gogora. Haur, gazte eta helduekin lana osatu dugu bete-betean, musika eremuan, eta abesbatzen mugimenduan.
Gipuzkoako Federazioa sortu behar zenean lehendabiziko saltseroa edo lehendakaria ni izan nintzen. Andra Marik lan handia egin du abesbatza eta musika munduan, 30 kontzertutik gora eman dituen urteak ere izan dira. Familia giroa nagusi, musika alorrean lan handia egin du eta egiten jarraitzen du, eta Euskal Herrira, Espainiako Estatura, Europara eta Amerikara ere eraman du Errenteriaren izena.
Txupinazoa pizteko unea nolakoa izango da?
Sentimendu handiko unea izango da zalantzarik gabe, eta ez dakit pultsuak erantzungo ote didan. Jose Luis Ansorena nirekin izatea nahi dut balkoian, asko gustatuko litzaidake. Hala bada, ez dakit nik egingo dudan, baina nik suziria bion artean piztea nahiko nuke.
Txupina alaitasunean eta giro ezin hobean piztea espero dut, eta jaiak ere hala joatea.
