Pirritx, Porrotx eta Marimotots pailazoak musikariek lagunduta ariko dira Niessenen, hilaren 18an, Ademgi elkarteak 'Musika ari du' ekitaldian.
Ion Collar, Jon Barriola eta Porrotx, gaurko aurkezpenean.
Bizipozaren aldarria egingo dute hilaren 18an Niessen Kulturgunean. Izan ere, Ademgi Gipuzkoako esklerosi anizkoitzaren aldeko jaialdia egingo dute. Oholtzaren gainean, Pirritx, Porrotx eta Marimotots pailazoak egongo dira, Euskadiko Orkestra Sinfonikoko hari laukoteak eta Xabier Zabala pianistak lagunduta,
Musika ari du ekitaldia eskainiz.
Porrotxek gaurko aurkezpenean azaldu duenez, ekitaldi “goxoa” izango da hurrengo igandekoa: “Guk ere kantu egingo dugu, amona Josefinak dioen bezala, bakoitzaren ahotsa onena delako”. Horrela, jaiotzear den haurrari eta jaioberriari abestuko diete, eta titia kantuz emango dute baita ere. Astoari, urtaroei, euri tantari eta beste hainbat gauzei buruz ere ariko dira.
“Ademgi bezalako elkarteak babestu baino, haiek ematen digute bizipoza. Denok ditugu gabeziak eta elkarri lagundu behar diogu, bizipoza izateko eta herri alaia mundu koloretsu batean sortzeko”, gaineratu du. Berak ere hurbileko kasuak ezagutzen ditu, eta egun osoan beren burua zaindu behar dutela nabarmendu du.
Kontzientziazioa eta finantzazioa
Jon Barriola Ademgiko kideak Errenteriako Udalari eskerrak eman dizkio hilaren 18ko ekitaldia antolatzeko laguntzarengatik. “Inoiz ez dugu trabarik izan, eta lana asko errazten digute”, gaineratu du Barriolak.
Esklerosi anizkoitzari buruzko azalpenak eman ditu Barriolak, segidan. “Nerbio sistema zentralari eragiten dio, eta mugitzeko zein sentsibilitate arazoak sor ditzake, baita minak ere. Edozein atali eragin diezaioke”, azaldu du.
Horrela, gaixotasuna dutenek errehabilitazioa egin behar dute bizitza osoan zehar, eta kasu batzuetan bizimodu normalagoa eraman dezakete, eta besteetan arazo gehiago dituzte. “Osakidetzak errehabilitazio mugatua eskaintzen du, eta ondoren, guk laguntzen dugu”, zehaztu du. Prezioa merkeago jartzen dute, pazientea laguntze aldera.
Elkartearen jarduera finantzatzeko, eta prezio baxuagoa izan dadin, horrelako ekitaldiak egiten dituztela esan du. Horrez gain, gaixotasunari buruz kontzientziatzea da beste helburua.
Ion Collar Kultura zinegotziak, bere aldetik, Katxiporretaren eta Ademgiren lana txalotu du, eta udalarengan jarritako konfiantza eskertu du.
Sarrerak sei euroan eros daitezke Xenpelar kulturdendan. Bi saio egingo dituzte: lehena 11:00etan hasiko da, eta bigarrena 12:30ean. Sarrera bakoitzarekin sorpresa bat emango dutela iragarri dute.
