Etxebizitza Bulegoa ireki dute

Mamuteko bulegoetako bigarren solairuan dago bulegoa. Udalaren etxebizitza politika integrala abiatzeko lehen urratsetako bat da.

Erik Gartzia Egaña

Oiartzun

2016/09/16

Leonet, Lekuona, Nebreda eta Etxebeste, bulego berrian.

Etxebizitza politika integral berria onartu zuen udalak duela hilabete batzuk, eta onartutako neurrien artean, bulego bat irekiko zutela iragarri zuten. Atzo ireki zuten, Mamut merkatalguneko bulegoetako bigarren solairuan. Zerbitzu integrala izango da, herritarrentzako erosoa izan dadin: informatzeko funtzioa izango du, kudeaketa lanak egiten lagunduko dute, laguntzak bertatik bideratuko dituzte, eta abar. Etxe hutsen jabeek zein maizterrek jasoko dute aholkularitza. Udalak, bere aldetik, zaharkituta geratu diren etxeak konpontzeko laguntza programa bat jarri du martxan. Udalak nabarmendu duenez, programa betetzeko lehen baldintza etxe hutsak alokairura ateratzea da. Horregatik, etxe hutsen jabeak animatu dituzte, “alokairu duina jar dezaten”. “Ustez, denei egingo die mesede: etxe hutsen egoera hobetu, auzoak biziberritu, etxebizitza beharrean daudenei irtenbidea eskaini eta etxe jabeak ere onura ekonomikoak izango ditu”. Etxebizitza Bulegoa martxan jartzeko, Oarsoaldea Garapen Agentziarekin hitzarmena sinatu du. Bulegoaren irekiera ekitaldian izan dira bi erakundeetako kideak. Udaletik Jexux Leonet alkatea eta Agurtzane Lekuona Gazteria zinegotzia izan dira, eta garapen agentziatik Fernando Nebreda lehendakaria eta Saioa Etxebeste teknikaria. Aurreko zitarekin funtzionatuko du Etxebizitza Bulego berriak. Astelehenetik ostiralera egongo da irekita, 09:00etatik 14:00etara. Zita hartzeko telefono zenbakia honakoa da: 943 49 41 29.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.