Euskara ikasi edota hobetzera animatu dute udalak eta AEK-k

Intxixu AEK-k ohiko ikastaroak eta AISA programa bezalakoak eskainiko ditu ikasturte honetan.

2016/09/16

Ballesteros, Azpiroz eta Arnaiz, Arraguan.

Intxixu AEK-ko zuzendari Saioa Ballesterosek eta udaleko Ioritz Aizpuru zinegotziak eta Aitziber Arnaiz euskara teknikariak euskara ikasi edota hobetzera animatu dituzte oiartzuarrak. Horretarako, Arragua auzoa aukeratu dute, kale erabileraren azken inkestaren arabera, euskara gutxien erabiltzen den auzoa delako. Oiartzungo euskaltegiak hainbat maila eskaintzen ditu: ohikoak —urratsak zein EGA eta euskara profilak ateratzeko klaseak— eta Oarsoaldeko Euskara Sailarekin zein udalarekin elkarlanean eskaintzen direnak —AISA programa etorriberrientzako, ostalari eta merkatariei zuzendutakoak, besteak beste—. Udalak beka sistemak martxan jarri ditu, euskara ikastea bultzatzeko asmoz. Baldintza batzuk betez gero, matrikularen %70 bere gain har dezake udalak. Ikasturte hasieran matrikularen erdia ordaintzen da, eta bukatzean, gainontzekoa. Hilaren 30era arte egin daiteke matrikula. Euskalduntzean urratsak eman nahi dituzten herritarrak Intxixu euskaltegira hurbiltzera animatu dituzte. AISA, etorriberrientzako Hilaren 30era arte ere eman daiteke izena eskualde mailako AISA programan. Munduko edozein tokitatik duela gutxi etorritako hamasei urtetik gorakoek parte har dezakete. 60 orduko ikastaroa da. Oiartzunen, Intxixu AEK-k emango klaseak, urriaren 3tik otsailaren 5era. Matrikulak bost euro balio ditu, eta udalaren diru laguntzak jaso daitezke. Euskara zerbitzuan eman behar da izena.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.