Lehen goiza; esku eta begietatik
Atlantikaldiko lehen goiza eskulangile eta ikusleena izan da. Bela ontzien erakusketa, maketagileak eta erramentarien bilkura eta erakusketa, hain zuzen.
Eskuz egindako euskal zein galiziar bela-ontziak, itsasontzien maketak egurrean eta herri desberdinetako erramentariak lanean ikusi ahal izan dira goizean Atlantikaldian.
Kultur jaialdiak eskulangileak bildu ditu goizean Panierren. Euskal Herrian zein galizian eskuz egindako bela-ontziak amarratu dituzte Oiartzun ibaian, baita bertara igotzeko gonbitea egin ere. Belaren luzeerak zubia gainditzen zuenez, ezin izan gara asko mugitu, baina ontzien nondik norakoak kontatu dizkigute Iginio Pausa eta Braulio Puga nabigatzaileek: “Ontziak ez ditugu guk egin baina mantenuaz arduratzen gara eta baita nagigatzeaz ere”. Galiziatik ekarritako 6 ontziak tipologia tradizionalekoak direla kontatu digute, tartean, ontzi modernoekin lehiatzen den bat dagoela, “tradizionaletan azkarrena”.
Galizian, bi urtero barkuen kontzentrazioak egiten direla kontatu digute eta bertan euskaldunek ere parte hartu dutela, Albaolako kideak hain zuzen ere. Katalunia, Portugal, Andorra eta noizbait Frantzia zein Kroaziako enbarkazioek parte hartzen dute bertan. hurrena 2017ko uztaila izango da Combarron eta gaur Errenteria-Oreretan dauden bela ontziak ere eramango dituzte. Bideoak ikusi ahal izan dira goizean eta arratsaldean Trintxerpen egongo dira ontziak ikusgai, lehorrean. Arrantza tresnak eta haien eboluzioak ere erakutsi zein azaldu dituzte adituek.
Era berean, itsasontzien maketagileak gerturatu dia plazara, maketak erakutsi zein nola egiten diren azaltzera; tartean, Pasai San pedron egiten ari diren baleontziarena. Unean bertan aritu dira sortzen.
Bestetik, eskulangileen topaketa honetan, herri desberdinetako erramentariak aritu dira ekoizpen lanetan. Jendeari parte hartzeko aukera eman diete ere.
