Izar Etxeberria eta Iker Sanz izan dira onenak

Euskadiko X. Soinu Zahar eta Euskadiko XXXVI. Gipuzkoar Aurresku txapelketak irabazi dituzte, hurrenez hurren.

olatz mitxelena

2016/10/03

Iker Sanzek eta Izar Etxeberriak jantzi dute aurten txapela.

Larunbata arratsaldean jokatu ziren Pasai Antxoko Ibaiondo pilotalekuan Euskadiko XXXVI. Gipuzkoar Aurresku txapelketa eta Euskadiko X. Soinu Zahar Txapelketa. Gipuzkoako Euskal Dantzarien Biltzarrak eta Alkarkide Dantza taldeak antolatzen dituzte urtero bi txapelketak, elkarlanean, Pasaiako Udalaren laguntzaz. Soinu Zahar Txapelketa Izar Etxeberria oiartzuarrak irabazi du laugarren urtez jarraian, eta aurreskularien lehian, berriz, Iker Sanz lezoarra gailendu da. Honenbestez, Tomas Murua Trofeoa hurrengo urtera arte Lezoko udaletxean gordeta izatearen ohorea irabazi du Sanzek, eta Izar Etxeberriak, berriz, Koldobika Jauregi eskultorearen Enborra tenteka garaikurra eraman du Oiartzungo udaletxera, oraingoz urtebetez. Aurten nabarmendu behar da Soinu Zahar txapelketak sari nagusia jarri duela jokoan –Koldobika Jauregiren Enborra tenteka – , aurrekoa, Tomas Murua saria izena zuena, Oiartzungo udaletxean behin betiko geratu zelako iaz Izar Etxeberriak hiru urtez jarraian irabazi ondoren (2013, 2014 eta 2015). Mutiletan bigarren saria ere Lezora joan zen, Beñat Asensioren eskutik, eta hirugarrena, berriz, Oiartzunera, Xanti Leonetek irabazita. Nesketan, Villabonako Ane Urruzolarentzat izan zen bigarren saria, eta Oiartzungo Katerin Artolak irabazi zuen hirugarren postua. Aurreskularien txapela irabazteko 5 dantzari aritu ziren lehian, eta Soinu Zahar txapelketa irabazteko lehian berriz, 6 neska. Aurreskulari guztiek, Itsasmendi txistulari taldea lagun, Ormatxulo, Aurkez aurke, Kontrapasa eta Zortzikoa dantzatu behar izan zituzten; neskek berriz, Ormatxulo, Upelategi, Kontrapasa eta Erribera dantzatu zuten. Tomas Murua zenari esker ona Aurtengo txapelketan Tomas Murua eskultorea gogoan izan dute antolatzaileek. Eskultore zarauztarra aurten zendu da, eta urte hauetan guztietan txapelketari egin dion ekarpena eskertu zioten larunbatean. Antolatzaileek gogorarazi zutenez, hiru sari nagusia eskaini dizkio Muruak txapelketari: lehenengoa Atarrabiako udalerrirako irabazi zuen Iker Larunbek; bigarrena, Oiartzungo udalerrirako Izar Etxeberriak, eta hirugarrena, oraindik jabetza jokoan duena. Esker ona adierazteko, oroigarria eman zieten Muruaren senideei.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.