Demoarsok martxoaren 19ra bitarteko bide orria aurkeztuko du

Martxora eta galdeketara bidean, datorren azaroaren 6an Pasaiako badia inguratuko duen giza katea egin nahi du Demoarsok Oarsoaldeko biztanleekin.

Ikerne Zarate Gartziarena

Errenteria-Orereta,Lezo,Oiartzun,Pasaia

2016/10/06

Oarsoaldean bildutako 6.203 sinadurak aurkezteko eta erabakitzearen aroa hasi dela esateko Demoarsok agerraldia egin zuen ekainean.

Ekitaldi irekia egingo du Demoarsok etzi (larunbata) Merkatuzar aretoan. Orain arteko ibilbidearen errepasoa egingo du dinamikak ekitaldiaren lehen zatian, Naroa Iturri kazetariak aurkeztuko duena. Aurrera begira jarriko da ondoren, eta martxoaren 19ra bitartean, Oarsoaldeko lau udalerrietan galdeketak egingo diren egunera arte, Demoarsok antolatu duen ibilbide orria adostu eta aurkeztuko du. Demoarso dinamikak izango du ere ibilbidean lagunduko duen doinua. Izan ere, Oiartzungo Beira taldeak abestia sortu du dinamikarentzat. Ez da bakarrik aritu lan horretan, abeslari eta sortzaile ezagunek ere hartu dute parte, eta abestiaren aurrerapen bideoa erakutsiko dute biharko ekitaldian. 10.000 lagunen giza katea Martxora eta galdeketara bidean, datorren azaroaren 6an Pasaiako badia inguratuko duen giza katea egin nahi du Demoarsok Oarsoaldeko biztanleekin, eta larunbateko ekitaldian, ibilbidea osatzen duen 85 zatietako arduradun eta gonbidatu ezagunek hartuko dute parte. Horiekin guztiekin zein ekitaldira bertaratzen diren lagunekin familia argazkia egingo du dinamikak 11:00etan. Atsedenaldia egin ondoren, berriz, Xabier Oleaga kazetariak gidatuta Zelai Nikolas, Mario Zubiaga eta Imanol Esnaolaren arteko solasaldia antolatu dute erabakitzeko eskubidearen gainean. Ekitaldia 10:00etan hasiko da Merkatuzarren eta antolatzaileek 12:30ean amaitzea aurreikusi dute.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.