Hondakinen zerga %10 igotzea proposatu du, zerbitzuak azken urteetan izan duen igoerari erantzuteko. Organikoa bereizten dutenek, hobari gehiago izango dute
Yon Collar eta Jon Txasko gaurko agerraldia.
2017ko ordenantza fiskalen gainean gobernu taldeak (EH Bildu eta Errenteria Irabaziz) duen proposamena publiko egin dute gaur Jon Txasko Ogasun zinegotziak eta Yon Collar Kultura zinegotziak. Aurten ere izoztu egingo dituzte ordenantza fiskalak salbuespen gutxi batzuekin. “Proposamena egiteko garaian kontuan izan dugu familiek ahalegin handia egin behar izan dutela krisi luze honetan eta baita urtetik urterako KPIa”, esan du Txaskok, eta testuinguru bereziak baldintzatu dituela ordenantzak, “alde batetik krisi ekonomikoa dugulako, eta bestetik, zerbitzuen kalitatea emnatentzeak eragindako gastuei aurrei egin behar diolako udalak”.
Gipuzkoako Foru aldundia egiten ari den berritze eta eguneratze lanaren ondotik, Ondasun Higiezinen balio katastral berria hurrengo urtearen lehenengo egunean indarrean sartuko dela azaldu du Taskok, “eguneratzeak, etxebizitzen balio katastralak igotzea ekarriko du, eta lokalen kasuan jaistea”. OHZ Ondasun Higiezinen Zergaren erreziboetan eragin handia izan ez dezan, ondasun higiezinen zergaren karga tasa %16,6 murriztea proposatu du gobernu taldeak.
Hondakinak jasotzeko zerbitzuak izango du igoera, %10ekoa, zehazki. Zerbitzuak azken urteetan izan duen igoerari erantzun nahian hartu duela erabakia udal gobernuak esan du Txaskok, “bereziki Gipuzkoako Hondakinen Kontsorzioak 2015eko abenduaren 22an onartutako tarifa igoeraren ondorioz”. Konpostaje komunitarioan edo etxeko konpostajerako programetan izena emanda dauden eta bosgarren edukiontzia erabiltzen duten bizilagunei, berriz, hobariak emango dizkie udalak. lehehengoek %25eko hobaria zuten eta datorren urtean berriz, %30ekoa izango dute. Edukiontzi marroia erabiltzen dutenek %25eko hobaria izango dute( aurten baino %15 gehiago).
Ur kontagailuen aldaketa
Ur horniketaren eta estolderiaren zerbitzuak ere igoera izango du proposamenaren arabera. Erabiltzaileek hiruhilean behin 0,67 euro gehiago oradaindu beharko dituzte. Irakurketa eskuz egiteko gaur egun dauden kontagailuen ordez, irrati bidezko kontagailuak jarri behar dituztelako egingo dutela igoera azaldu du Txaskok: “Inbertsio hori 10 urtean egitea aurreikusi dugu. Egungo irakurketa sistemak zaildu egiten duela hiruhileko irakurketa egitea eta ur galerak eta matxurak ezin izaten dira antzeman”.
Energia eraginkortasuna hobetzeko sistemak barneratu eta fatxada edota teilatuen konponketa integralak egiten dituztenei eta lokalak berritu edota egokitzeko obrak egiten dituztenei (merkataritza jarduerak, zerbitzu jarduerak, ostalaritza eta sukladaritza establezimenduak) onura fiskala ezarriko diete zerga tasa murriztuta.
Horrekin batera jarduera ekonomikoen gaineko zergaren gaineko hobariak mantendu dituzte proposamenean, ibilgailu elektriko eta hibridoentzat eta kilometroko 12 g CO2 baino gutxiago ixurtzen dutenentzat hobariak mantenduko ditu, eta baita obren gaineko zergako hobariak. Interes bereziko obretarako %95eko hobaria aurreikusi dute, ikastetxe publikoetan egindako obretarako bezala eta jarduera babestuetan berriz, %34ra arteko hobaria aurreikusi dute.
Komertzioa sustatzeko, saltokiak jarri eta irekitzeko lizentzien tarifen murrizketa egtea proposatu du udalak, “150 metro koadro arteko establezimenduetan, tarifa 561,50eurokoa izan beharrean 100 eurokoa izango da, %82 txikiagoa”, esan du Collarrek.
Publiko egin duten proposamena udalean ordezkatuta dauden beste alderdi politikoei helarazi diotela esan du bestalde, Txaskok, “suposatzen dugu ordenantza fiskalen gainean egindako proposamena aztertzen ari direla”. Behin betiko onarpena emateko, hilaren azken asteartean egingo duten plenora arte itxaron beharko du gobernu taldeak.
