Fanderiako ubidea balioan jartzeko lanak egiten ari da udala
Fanderiako errota eta bere sistema hidraulikoa berreskuratu nahi ditu udalak, historia ondarea eta ibaia interpretatzeko gune bat sortzeko asmoarekin.
Udalaren arabera, errotaren beheko zati horrek du baliorik handiena.
Fanderiako errotaren ubidean hobekuntza lanak egiten ari da Errenteriako Udala, Paisaiarako Ekintza Planean proposatutako ekintzen harira. XVIII. mendeko elementu hori balioan jartzea da helburua, burdina lantzeko industriaurreko instalazio garrantzitsua izan zelako. Udalak azaldu duenez, errotaren beheko zati horrek du balio handiena, eta gainera bertan da egun errepide batek estaltzen duen Olaldeko zubi zaharra.
Orain arte tarte batean zeuden zuhaixka exotikoak kendu dituzte, ubidea hobeto ikusteko, eta bertan pilatuta zegoen zaborra jaso du udal zerbitzuak. Gainera, bertako espezieak mantendu dira, lizarrak eta erramuak, eta zuhaitz eta zuhaizka ale berriak landatuko dituzte ingurumena hobetzeko.
Aisialdiari begirako gune atsegina egokitu nahi du gainera eremu horretan udalak, eta eraitsitako hainbat eraikinen hondarrak jarriko ditu: baserriak eta Fanderiako biltegia, besteak beste. Bertatik orain izkutuan dagoen Olaldeko zubia ikusi ahalko da, gainera.
Fanderiako errota eta bere sistema hidraulikoa berreskuratzeko egiten ari da ekintza horiek udala, besteak beste, historia ondarea eta ibaia interpretatzeko gune bat sortzeko asmoarekin. 
