Ibilaldi osasuntsuak, Mugituz, eta Mugi zaitez bihotza programak abiatu ditu hirugarrenez pertsona helduei begira.
Fanderiako Udal Kiroldegia
Normalean kirola egiten ez duten herritarrei begira, Ibilaldi osasuntsuak, Mugituz, eta Mugi zaitez bihotza, kirol programak martxan jarriko ditu udalak hirugarrenez. Programetako lehena, 65 urtetik gorako pertsonei begirakoa da eta izenak azaltzen duen moduan, ibilaldi osasuntsuak egiten dituzte eskiatzeko erabiltzen diren antzeko bastoiak erabilita.
Ibilaldi osasuntsuak jardueraren barruan, lau talde osatu ditu udalak. Astelehen eta asteazkenetan Fanderiako kiroldegitik irtengo dira, eta astearte eta ostegunetan, berriz, Galtzarabordako kiroldegitik, 10:45ean. Aire librean egiten den jarduera da, baita euria egiten duenean ere, eta begirale batek bideratuko ditu. Jarduera horretan parte hartzeko, arropa erosoa eta ariketa fisikoa egiteko gogo handia behar dela azaldu dute udaletik, eta aldez aurretik izena eman beharko dute interesdunek. Horretarako Fanderiako igerilekuko harreran (943 34 44 23) edo Galtzarabordakoan (943 44 96 90) eman beharko dute izena.
Ahul daudenei begira, Mugituz
Mugituz da udalaren bigarren programa jarduera fisikoa sustatzeko. Paziente ahulei begirakoa da: 8 urtetik gorakoak dira, bakarrik bizi dira, ezintzen dituen patologia kronikoren bat du, polifarmazia, edo gizarte laguntza ez dutenei zuzendutakoa da.
Kasu horretan osasun alorreko profesionalen ziurtagiria behar dute parte hartzeko: “Iztieta eta Beraungo anbulatorioetako pazienteen artean antzeman eta beren osasuna honbetzeko jarduera fisikoa egin behar duten pertsonak bidaltzen dituzte”. Mugituz programak bi talde ditu 10:15etik 11:15era bata, eta 11:15etik 12:15era bestea, astelehen eta asteazkenetan Galtzarabordako kiroldegian.
Mugi zaitez bihotza da hirugarren programa. Tratamendu medikuarekin batera bizimodu ohituretan aldaketak egin behar dituzten pertsonei begirakoa da. Jarduera fisikoan hasi gabeko pertsonak dira hartzaileak, eskarmentu txikia dutenak eta jarduera gainbegiratua eta kontrolatua behar dutenak: bronkitiko kronikoak, arrisku kardiobaskular handia edo moderatua dutenak, edo gutxiegitasun kardiako kongestiboaren diagnostikoa duten pertsonak.
Mugituz programan bezala, Mugi zaitez bihotzan parte hartzeko osasun zentroetako medikuek antzemango dituzte pazienteen artean hartzaileak.
Hiru jarduerak doakoak dira, Errenteriako Udalak hartzen ditu beregain Eusko Jaurlaritzaren Osasun Sailarekin lankidetzan.
