[Argazki galeria] Trabajadoreak berriz ere Lezon

Trabajadoreak berriz ere Lezon izan dira. Etxetxok omenaldia egin zien urriaren 9an, haiei eta senideei, herrian egin zuten bidea herritarrei azalduz.

Urko Etxebeste

Lezo

2016/10/25

Errotetako barrakoietan omenaldia egin zieten trabajadoreei eta haien senideei.

Hilaren 9an, Lezoko memoria historikoa berreskuratzeko taldeak, Etxetxok, ekitaldi hunkigarriak egin zituen. Trabajadoreek, frankistek behartuta lan egin zuten pertsonek, herrian utzi zuten arrastoan sakondu zuten, eta haiei eta euren senideei ere omenaldia egin zieten. Goizean trabajadoreek egiten zuten bideari ekin zioten. Lehen geldialdia Iparragirreko barrakoien aztarnetan egin zuten, ondoren Erroteta aldera joateko. Omenaldia egin zieten bertan trabajadoreei eta haien senideei, eta haiei eskeinitako oroitarria inauguratu zuten, Luis Ortiz trabajadore izandako bizkaitarra eta beste hainbat senide bertan zirela. Herrirantz abiatu ziren ondoren. Bertan, Andreonen, trabajadoreak azalduz iren. Izan ere, Orratx! antzerki taldeko kideek trabajadoreen errekreazio antzeztua egin zuten, detailez josita. Trabajadoreak eta herritarrak Gurutze Santuaren plazara joan ziren bertatik, omenaldi ekitaldiekin jarraitzeko dantzari, txalapartari, eta abeslariekin. Unerik hunkigarrienak bertan bizi izan ziren. Lezon izan ziren, Luis Ortizen gain, Kataluniatik etorritako trabajadoreen senideak —lezoarrekin ezkondu ziren Kataluniako atxiloetako batzuk—, edo Marcelino Camacho sindikalista historikoaren alaba, besteak beste; Camacho ere egon zen Lezon trabajadore modura. Etxetxok trabajadoreen memoria berriz ere ekarri du Lezora. Baina lanean jarraituko dute memoria historikoa berreskuratzeko bidean.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.