Laugarren edizioa izango du euskarari arnasguneak zabaltzeko jaiak, eta horretarako egun osoko egitarau zabala prestatu dute Oarsoaldeko herrietako euskaltegiek, Prest! Euskara taldeak eta Oarsoaldeko Euskara Batzordeak.
Iazko Mintzagun Jaia Oiartzunen egin zuten.
Mintzagun Jaia egingo dute datorren larunbatean (hilak 29) Lezon. Laugarren edizioa izango du euskarari arnasguneak zabaltzeko jaiak, eta horretarako egun osoko egitarau zabala prestatu dute Oarsoaldeko herrietako euskaltegiek, Prest! Euskara taldeak eta Oarsoaldeko Euskara Batzordeak.
Jaia 11:30ean hasiko da Lezoko musika eskolako trikitilarien kalejirarekin eta Lezo ezagutzeko lau bisita gidatu egingo dituzte ondoren herriaren alde zaharrean barrena. Luxuzko gidak izango ditu bisitak gainera, Oroitzene AEK Euskaltegiko lau ikasle arituko baitira azalpenak ematen. Ongi Etorri ekitaldia hartuko du ondoren herriko plazak eta muxikoek ere bat egingo dute, emanaldia eskainita plazan bertan. Jokoak ere ez dira faltako, eta herri bazkarian bilduko dira, ondoren, parte hartzaile guztiak Gurutze Santuaren plazan. Eguraldiak lagunduko ez balu, Karlos Saldise plazan egingo dute bazkaria.
Zapia erosi
Bazkarian parte hartu nahi dutenek, aldez aurretik erosi beharko dute Mintzagun zapia. Horretarako, euskaltegietara, Lezoko Aizpea, Sahatsa, Gure Txoko, Uztarri, Jaizkibel, Txingurri, Sotxo, Utrdaburu, Azkena, Tiñelu, Lezotarra edo Orkidea tabernetara jo beharko dute. Zapiak bazkaltzeko (edaria eta kafea salbu) eskubidea emateaz gain, aipatutako taberna horietan beherapenak, onurak eta eskaintza bereziak baliatzeko aukera emango du. Xabi Santebastianek kantaldia eskainiko du bazkalondoan.
Errenteria-Orereta, Lezo, Pasaia eta Oiartzungo herritarrak parte hartzera deitu dituzte Mintzagun Jaiaren antolatzaileek, “giro ederrean eguarte arratsalde polita pasatzeko aukera izango baita, aspaldiko lagunak ikusi eta euskaraz gozatzeko”.
Mintzagun Jaiaren egitaraua
- 11:30: Lezoko musika eskolako trikitilarien kalejira.
- 11:45: Bisita gidatuak (20 lagun bakoitzean).
- 12:30: Ongi Etorri ekitaldia Gurutze Santuaren plazan.
- 12:45: Muxikoak Gurutze Santuaren plazan.
- 13:15: Zabarreren altxorraren bila aztarna jokoa parte zaharreko kaleetan barrena.
- 13:45: Bisita gidatuak.
- 14:30: Herri bazkaria Gurutze Santuaren plazan. Eguraldi txarra egingo balu Karlos Saldisen. Ondoren, Xabi San Sebastianekin kantaldia.
