Ttur-ttur eta udalak antolatu dituzte euskara eskolak. Oinarrizko maila edo aurreratua aukera daitezke. Hilaren 20an itxiko da izena emateko epea.
Iazko parte hartu zuten merkatarietako batzuk.
Ttur-tturrek eta udalak, aurten ere, merkatari eta ostalarientzako euskara eskolak antolatu dituzte. Iazkoari jarraituta, ikasturte honetan ere oinarrizko maila eta aurreratua eskainiko dituzte. Azaroaren 20ra arte eman ahal izango da izena. Oiartzungo Euskara zinegotzi Ioritz Aizpururen esanetan, merkatari eta ostalarien sektorea euskalduntzea “estrategikoa” da.
Iaz egin bezala, euskara eskola horiek Mamut eraikinean emango dituzte, Oarsoaldea Garapen Agentziak duen gela batean. “Han inguruan lan egiten duten merkatari eta ostalariek euskara eskolekiko interesa azaldu zuten iaz, eta erraztasunak emate aldera, erabaki genuen eskolak lantokitik ahalik eta gertuen eskaintzea”, zehaztu dute antolatzaileek. Hala ere, ez Ugaldetxoko merkatalgunean lanean ari direnei bakarrik mugatuko, Oiartzungo merkatari eta ostalari guztientzako izango baita.
Horrela, 60na orduko iraupena izango dute oinarrizko mailako eskolek zein aurreratukoek. Lehenengoen kasuan, bezeroekin oinarrizko elkarrizketak izatea da helburua. Maila aurreratua aukeratzen dutenek, berriz, euskara pixka bat ulertzen dutenak izango dira, eta xedea ezagutzan sakontzea eta hitz egiten trebatzea izango da.
Prezioa eta deskontuak
Ikastaro bakoitzak 60 euroko kostua izango du. Oiartzungo establezimenduetako langileek beka jasotzeko aukera izango dute, eta gutxiengo asistentzia kopurua betez gero, udalak ikastaroaren %70 ordainduko die. Izena ematen dutenen artean erabakiko dituzte egunak eta orduak. Intxixu-AEK-ko irakasleek emango dituzte eskolak, eta ikasle taldeen finantzazioa bezala, udalak bere gain hartuko du kostua.
Izena emateko, Ttur-tturekin jarri beharko da harremanetan. E-posta, telefono (943 26 01 82) edo Fermiñeneko bulegora agertuz jar daitezke harremanetan. Merkatari eta ostalariak animatu dituzte, “euskararen erabilerak euren establezimenduari kalitatea emango diolakoan.
