Errenta aitorpena euskaraz egin duten oiartzuar kopuruarekin pozik daude Ttur-ttur eta udala. Datozen urteetan handiagoa izatea nahi dute.
Inoiz baino oiartzuar gehiagok egin du errenta aitorpena euskaraz.
2016ko errenta kanpainaren datuekin pozik daude Ttur-ttur Euskaltzaleon Bilgunea eta Oiartzungo Udala. Izan ere, Ogasunarekin urteroko zita inoiz baino jende kopuru altuagoak egin du euskaraz. Zehazki, oiartzuarren %36,61 izan zen euskaraz egitea eskatu zuena. Zenbaki absolutuetan jarrita, 5.372dik 1.967 izan ziren hizkuntza aukera hori egin zuena.
%35eko langa gainditzea lortu duten herritarren inplikazioa txalotu dute errenta aitorpena euskaraz egitea sustatu zuten udalak eta Ttur-tturrek, baita finantza erakundeena ere. Aitorpengileen kopurua pixkanaka ari da igotzen, baina euskaraz egiten dutenena, proportzionalki handiagoa da.
Hala ere, igoera ez da hasierako urteetakoa bezain nabarmena. Horrek, baina, ez du poza zapuztu. “Emaitza pozgarria da”, adierazi du Ioritz Aizpuru Euskara zinegotziak. “Gero eta jende gehiagok aukeratzen du bere bizitzako esparru guztietan euskaraz bizitzea, baita diru-kontuak egiteko garaian ere”, zehaztu du. Urtero finantza erakundeei laguntza eta babesa eskatzen diete, errenta aitorpena euskaraz egiteko, eta hori eskertu du Aizpuruk.
Azkenik, kopuruak igotzen jarraitzeko nahia azaldu du Aizpuruk, eta horretarako kontzientziazioa “beharrezkoa” dela ziurtatu du.
Honakoak dira urtez urteko datuak. Urte bakoitzekoa hurrengoan egiten:
- 2004: 4.772 eginda, 297 euskaraz (%6,2).
- 2005: 4.945; 825 (%16,68).
- 2006: 5.077; 1.00o (%19,7).
- 2007: 5.314; 1.132 (%21,3).
- 2008: 5.476; 1.286 (%23,48).
- 2009: 5.451; 1.476 (%27,08).
- 2010: 5.469; 1.545 (%28,25).
- 2011: 5.523; 1.681 (%30,44).
- 2012: 5.391; 1.720 (%32).
- 2013: 5.314; 1.733 (%32,61).
- 2014: 5.328; 1.834 (%34,42).
- 2015: 5.372; 1.967 (%36,61).
