Urrutikoetxea-Ander Imaz bikotea Olaizola II.a-Untoriari gailendu zitzaion atzo Bilbon, nahiz eta atzetik hasi ziren.
Ander Imaz pilotari oiartzuarrak Eskuz Binakako Txapelketan debuta egin zuen atzo arratsaldean. Mikel Beroizen partez jokatuko du txapelketa guztia, Mikel Urrutikoetxearekin.
Bi pilotari horiek osatutako bikoteak aurreko bi partidak galdu zituen. Atzokoa, ligaxkako hirugarren partida zen. Arerio gogorrak zituzten: Olaizola II.a eta Untoria. Partidaren hasieran bazirudien aurreko bi jardunaldien bidea hartuko zutela, hamar tantoko aldea atera baitzieten bikote gorriak (12-2). Urrutikoetxea eta Imaz esnatu, kontzentratu eta 17-17 berdintzea lortu zuten. Partida oso lehiatua izan zen Bilboko Bizkaia frontoikoa.
Txapelketako lehen puntua eskuratuta, Asegarceko bikoteak ostegunean jokatuko du, Ezkurdia-Merinoren kontra. Arrasaten izango da, santamasen barruan, 18:00etatik aurrera.