Aurtengo aurrekontuen bidea jarraituko dute datorren urtekoek, eta udal eraikinen erabilera zehazteko proiektuekin hasiko dira, besteak beste.
EAJko zinegotziek (bi joan ziren atzo) “baiezko kritikoa” eman zieten 2017ko aurrekontuei.
Atzo arratsean abenduari dagokion plenoa egin zuen udalbatzak. Udal gobernu taldeak 16 milioi eta erdi euroko aurrekontuak aurkeztu zituen. Jexux Leonet alkateak azaldu zuenez, aurrekontuak osatzerako orduan, auzo batzarretan egindako ekarpenak, zein herriko eragile eta oposizioko EAJrenak kontuan hartu dituzte. Guztien parte hartzea eta jarrera eskertu zituen.
Errepaso azkar bat eginez, alkateak azaldu zuen herria berritzeko ildoarekin jarraituko dutela 2017an ere. Horrela, diru partidak honako proiektuetara bideratuko dituzte, besteak beste: udal eraikinen (Arizmendi, Egiaenea eta Urkabe Baita) erabilerako proiektuak idaztea; errepideak berritzea (Lintzirin ingurua); auzoetako batzarretan tokian tokiko eskakizunak betetzea; herri bideak txukuntzea; Larre Plana eta Lur Bizi egitasmoekin jarraitzea; etxebizitza plan integralarekin jarraitzea eta gazteen etxebizitza plana osatzea; argiteria aldatzea… Horrez gain, Madalensoro pilotalekua berritzeko diru laguntza eskatuko diote aldundiari.
Horrez gain, gazteria, berdintasun eta ongizate sailetara partida berriak bideratuko dituztela jakinarazi zuen. Ongizate sailean, gainera, ardura berri batzuk hartuko ditu udalak 2017tik aurrera.
Aurrekontu orekatutzat jo ditu Leonetek
EAJk, baiezkoa
Oposizioko taldeak, EAJk, aurrekontuen alde bozkatu zuen. Iaz abstenitu egin zirela gogorarazi zuen Rafael Bergaretxe eledunak. Izan ere, orduan beraiek egindako ekarpen batzuk kanpoan geratu zirela adierazi zuen, baina 2017akoan sartuko direla eta aldeko bozka eman zuen.
Horrela,
bariantean aparkatzeko “festarekin” bukatzeko neurriak hartzea txalotu zituzten, eta horri irtenbidea ematea. Lintzirin, Larre Plana, Lur Bizi eta antzeko planei ere ongietorria eman zioten EAJko zinegotziek, baita udal eraikinetan proiektuak abiarazteari ere. Gainera, zorra 700.000 euroan gutxitzea ere begiz onez ikusi dute —bi milioi euroan geratuko dela esan zuen Leonetek, eta ez mailegurik eskatzea ez dutela aurreikusten—.
Hala ere, baiezko botoa “kritikoa” dela adierazi zuen. Adibidez, uren tasari dagokionez, zalantzak agertu zituen. Jeltzaleek uste dute Añarbek egindako igoerarekin bat ez datozela, eta agian udalaren diru-kutxa hipoteka dezakeela. Alkateak erantzun zion estolderia udalak kudeatzen duela, eta Añarberi ordaindu beharrekoa eta udalak jasotzen duena orekatua dela.
Bestalde, hondakinen zergetan ere duda-mudatan daude EAJkoak. Bergaretxek esan zuen Zubietako errauste plantaren proiektua aurrera doala, eta ez dakiela udalari zenbateraino eragingo dion. Horregatik, hondakinen batzordea “ahal bezain pronto” martxan jartzeko eskatu zion udal gobernu taldeari. Alkateak esan zion eurek errauste plantari buruzko informazio gutxi jasotzen dutela, eta urtarrilean batzordea eratzen saiatuko direla.
Udal langileak
Plenoko gainontzeko puntuei dagokienez, udaleko langileei soldata %1 igotzea adostu zuten bi udal taldeek. Izan ere, 2010etik ezin izan diete soldatarik igo, “Madrilgo Gobernuaren injerentziagatik”, alkateak salatu zuenez.
Administrazioaren eta langileen arteko bilerak emankorrak izan direla jakinarazi zuen alkateak, eta horren adibide dela langileen batzordeak aho batez onartzea udal gobernuak proposatutako igoera. “Bi aldeen arteko harremanak normalizatu nahi genituen, eta hala adostu dugu”, gaineratu zuen.
Gainontzeko puntu guztiak ere aho batez onartu zituzten atzo bildutako zinegotziek.
Plenoaren bukaeran, galdera eta eskaeren txandan, udal idazkariak hitza hartu zuen. Izan ere, Martin Beramendi alkatearen aurkako epaiketan deklaratu behar izan baitzuen garaiko udaltzainburuarekin eta artxibozainarekin batera. Beramendiri udalaren dokumentuak modu desegokian zaindu izana leporatzen diote. Udal idazkariak esan zuen “gogorra” izan dela epaiketan deklaratu behar izatea, eta berak bere lana bete besterik ez zuela egin defendatu zen. Udalaren babesa jaso zuen udal idazkariak.
