Lezoko Udalak eta Sanmarkok bost edukiontziko sistemaren hitzarmena sinatu dute

Bosgarren edukiontzia lehenik Altamira auzoan jarriko dute. Urtean zehar beste auzoetara zabalduko dute bost edukiontziko sistema.

Urko Etxebeste

Lezo

2017/01/02

Jesus Mari Martiarena alkatea eta Sanmarkoko ordezkaria, hitzarmena sinatzeko ekitaldian.

Urteko azken udalbatzarrean erabakitakoa egikaritzen ari da Lezoko Udala. Sanmarko Mankomunitatearekin hitzarmena sinatu du, hondakinen bilketaren ardura mankomunitateak har dezan. Hala, bost edukiontzien sistema faseka ezarriko dute herrian, era lehenik eta behin, Altamira auzoan izango da abian. Urtarrilean hasiko dira bost edukiontziekin Altamiran. Esperientzia pilotua izango da. Udalak adierazi duenez, “era eroso eta errazago batean birziklatzea helburu duen sistema” urtean zehar jarriko da gainontzeko auzoetan ere. Gainera, udal erakundearen arabera, atez atekoak baino kostu txikiagoa izango du sistema berriak, “udalarentzat ekonomikoki jasangarriagoa izango da. Horrek, beharrezkoak izango diren langile kopurua atez atekoaren aurretik zegoenaren antzekoak izatea ekarriko du”. Sistema berriarekin, lezoarrek hondakinak edukiontzietan asteko edozein egunetan utzi ahal izango dituzte, “honek dakarren erosotasunarekin” udalaren arabera: “Lezoarren eguneroko bizitza erraztea du helburu, etxe bakoitzeko ohituretara egokituko den eta egutegirik ez duen sistema da”. Udalak uste du sistema aldaketak ez duela eraginik izango herriaren birziklatze tasan, “sistema hau etxe bakoitzeko ohituretara egokitzen denez, hondakinak sailkatzea erraztuko du. Lanean jarraituko dugu gaikako bilketa tasak egunetik egunera hobeak izan daitezen, eta informazio eta sentsibilizazio kanpainak egingo ditugu hori helburu hartuta”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.