Konponketagatik 13.000 euro ordaindu beharko ditu udalak, eta hilabetez igogailuetako batek ez du zerbitzurik emango.
Igogailua geldirik dago eta hilabete emango du horrela konpondu arte.
Galtzarabordako igogailuetako bat kixkalita gelditu da pasa den asteburuan egindako erasoen ondorioz. Ez da igogailu horiek erasoa jasan duten lehen aldia, eta halako egoerak ez errepikatzeko neurriak hartuko dituela jakinarazi du udalak. Batetik, gauez itxi egingo dituzte igogailuak; eta bestetik, kamarak jarriko dituzte erasotzaileak identifikatu ahal izateko. Auzo batzarrean udal ordezkariei eskaera horiek egin zizkieten bizilagunek, eta epe laburrean martxan izango direla jakinarazi du udalak.
Konponketagatik 13.000 euro ordaindu beharko ditu udalak, eta hilabetez igogailuetako batek ez du zerbitzurik emango. Izan ere, Oronak piezak egin behar dituelako kaltetutakoak ordezkatzeko. Hiru igogailu daude Galtzarabordan eta horietako bakoitzak 40.000 inguru desplazamendu egiten ditu hileko. Gaur goizean bertan, kexu ziren igogailuak erabiltzen dituzten bizilagunetako batzuk: “Guri mesede izugarria egiten digute igogailuek, eta halako gertaerek bizilagunak eta udala kaltetzen dituzte. Bitartekoak eskatzen ditugu, baina gero bandalo batzuk azaldu eta puskatu egiten dute. Ezin ditut ulertu halakoak”.
Joan den urtean udalak 39. 122 euro ordaindu behar izan zituen igogailu horietan egindako erasoen ondorioz sortutako kalteak konpontzeko. Gainera, bertako bizilagunek zerbitzua etenda izan zuten denbora luzez. Egoerak bereziki kaltetzen ditu mugikortasun arazoak edo zailtasunak dituztenak.