Dibertsitate Funtzionala duten haurrei begirako programaren bidez, ostiralero, teknologia berrien gaineko saioak egin dituzte Mindararen egoitzan urte osoan zehar.

Mindy programan parte hartzen duten haurretako batzuk. Argazkia: Mindara elkartea.
Duela urtebete abiatu zuen Mindy programa Mindarak, Dibertsitate Funtzionala duten Gipuzkoako pertsonekin lan egiten duen elkarteak. Dibertsitate Funtzionala duten haurrei begirako programaren bidez, ostiralero, teknologia berrien gaineko saioak egin dituzte Mindararen egoitzan urte osoan zehar. Robotika, sare sozialak, bloga, bideo edizioa eta 3 D inprimagailuekin aritu dira besteak beste Mindy programaren barruan bildutakoak.
Atzo egin zuen urtea programak, eta Mindara elkarteak eskerrak eman dizkie, hura posible egiteko lagundu duten enpresa eta erakundei: Espacio Ekilore, Hirusec, Rekkam, Tumaker, Oarsoaldea Garapen Agentzia eta Errenteriako Udala. Urtebeteko bidearen gaineko balorazio positiboa eginda, material informatiko gehiago eskatu du elkarteak: “Daukaguna motz gelditzen ari da aurten ume kopurua handitu egin delako”. Horrenbestez, lagundu nahi duten elkarte, norbanako zein enpresei Mindararekin harremanetan jartzeko eskatu diete. Olibet kaleko 6. zenbakian du egoitza Mindarak, eta 609 68 35 09 edo 616 45 23 31 telefono zenbakietara dei dezakete bestela, lagundu nahi dutenek.