Errenteriako Indoor Triatloian izena eman daiteke
500 metro igerian, zortzi kilometro bizikleta estatikoan eta 3,5 kilometro korrika egin beharko dituzte.
Errenteriako Indoor Triatloia antolatu du BeOne Errenteriak larunbaterako. Fanderiako Udal Igerilekuan egingo dute Kiroletako azpisailaren laguntzarekin, eta parte hartzaileek 500 metro igerian, zortzi kilometro bizikleta estatikoan eta Fanderiako bidegorrian barrena prestatutako zirkuituan 3,5 kilometro korrika egin beharko dituzte. Parte hartzaile bakoitzaren denbora kalkulatzeko garaian, hiru proben artean egindako atsedena ere hartuko dute kontuan antolatzaileek.
Hiru modalitate izango ditu triatloiak: gizonena, emakumeena eta taldekakoa. Taldeak hiru kirolarik osatuko dituzte eta proba hiru parte hartzaileen artean banatuko da, eta ekipoko taldekide bakoitza diziplina bakar batean ariko da. Taldeak, gizonak osatuak, emakumeek osatuak edo mistoak izan daitezke.
Proba irekia da, eta parte hartzeko 6 euro ordaindu behar dira; talde modalitatean parte hartzen dutenek 12 euro (4 euro bakoitzeko). Izena emateko epea zabalik da eta interesdunek Fanderiako igerilekuetako harreran (943 34 44 23) edo Galtzaraborda kiroldegiko harreran (943 44 96 90) eman behar dute izena. 
