'Lekuona adostasun espazio bihurtzeko garaia da'

Lekuonaren kultura eta arkitektura proiektu berria definitzeko prozesua "lehenbailehen" abiatu nahi dute

2017/01/27

Mendoza eta Collar, Lekuona atzean dutela.

Konfrontaziotik aterata, Lekuona adostasun espazio bihurtzeko garaia dela esan du Julen Mendoza alkateak. Lekuonaren gainean Jon Collar Kultura zinegotziarekin batera gaur goizean egindako agerraldian egin ditu adierazpen horiek Mendozak, eta Lekuonaren kultura eta arkitektura proiektu berria definitzeko prozesua “lehenbailehen” abiatu nahi dutela gaineratu du. Horren harira, arkitektura proiektua idazteko lizitazio prozesua martxan da, eta gaurko agerraldian jakinarazi dutenez, laster jarriko da martxan kultura proiektua definitzeko kontratuarena”. Hori bai, azken hori, Errenteria-Oreretako kultura, politika eta gizarte eragileek definituko dutela erantsi du Mendozak, eta horretarako parte hartze prozesua egingo duela udalak jakinarazi du. Hilabeteko epean hura abiatzea espero dute. Garapen eredu berri batera eraman nahi dutela Errenteria-Orereta gaineratu du, “ekonomia kreatiboa oinarri duen eredurantz, hain zuzen ere”. Lekuonak 3.600 metro koadro izango ditu erabilgarri eta sorkuntza artistikoa babestuko du. Horretarako, arte eszenikoak, musika, arte plastiko eta bisualak edo multimedia sorkuntzak bezalako diziplinetarako lan espazioak izango ditu, bai eta informazioaren eta komunikazioaren teknologien (IKT) nahiz artisautzaren gaineko proiektuetarako ere. Ildo beretik mintzatu da Collar. “Lekuona diziplina anitzetarako espazioa izango da, arte hibridazioa sustatzea izango du helburu, arte ikerketako eta kalitatezko eduki berrien sorkuntza erreferentzi izateko, eta kolektibo, sortzaile eta proposamenen topagune izateko”. Kultura planaren “nodoa”izango dela Lekuona gaineratu du Mendozak, “udalerrian dauden gainerako kultura ekipamenduak birdefinitzen lagunduko duena”. 2018. urte amaierarako Lekuona amaituta nahi dute. Lekuonaren gainean erreportaje zabala argitaratu du gaur papereko edizioan HITZAk.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.