[Galeria] Elkartasun autokarabanak hezur muin emaile bila

Hezur muin emaileak lortzeko, eta horren garrantziaz jabetzeko, topaketa egiten ari dira Errenteria-Oreretan 50 bat autokarabanazale.

Urko Etxebeste Petrirena

Errenteria-Orereta

2017/01/28

Autokarabanak, Arramendin.

Hezur muin emaile izatearen garrantzia zer nolakoa den Errenteria-Oreretako kaleetan nabarmen gelditzen ari da asteburuan. Izan ere, Sorbeltz autokarabanazaleen elkartearen ekimenez, eta Errenteriako Udalaren laguntzarekin, autokarabanen topaketa egiten ari dira herrian. Asmoa, elkartasuna, hezur muina behar dutenen aldeko elkartasuna. Bidea, informazioa eman eta kontzientzia sortzea. Helmuga, hezur muin emaileak lortzea. HITZAk, aste honetako papereko edizioan, gaiaren gaineko erreportajea argitaratu du. Jabi Saiz oreretarraren lagunek eta hurbilekoek antolatu dute topaketa. Hezur muina behar du Saiz oreretarrak. Baina handik harago joan nahi dute, Saiz ez delako hori behar duen bakarra ez Euskal Herrian ez munduan. Hezur muin emaileak, mundu mailako emaile dira, izan ere, bateragarritasun arazoak medio, mundu mailako emaileen eta gaixoen erregistro bateratua osatua dago. Topaketaren barruan —Arramendin aparkatu dituzte elkartasunez beteriko autokarabanak— goizean hitzaldia eman dute Reina aretoan, gaiaz azalpenak emateko, Donostia Ospitaleko Transplante Koordinazio zerbitzuko kideek. Ondoren, luntxa egin dute, norberak eramandakoarekin Koldo Mitxelena ikastetxean. Bazkaldu eta gero, Gaztañoko elkartean (17:00etan), haurrentzako zinema (Minions) eta txokolate jatea izango dira, helduentzako filmaren aurretik (Planta 4). Bihar Albaolara bisita egingo dute herrira iritsi diren 50 bat autokarabanen gidari eta laguntzaileek. Balio dezala elkartasun karabana uholde honek hezur muin emaile gehiago egoteko.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.