Murugarrenekin zerbait (ona) gertatuko da Pagoan
Abeslari errenteriarrak 'Zerbait ari da gertatzen, hor' bakarkako zazpigarren diskoa aurkeztuko du bihar gauean Pagoan.
Txuma Murugarren (Errenteria-Orereta, 1964) abeslariak kontzertua emango du bihar gauean Pagoa aretoan. Bizkaia aldean bizi den abeslariak, sei urteren ondoren, zazpigarren bakarkako lana kaleratu zuen duela hilabete gutxi: Zerbait ari da gertatzen, hor. Aurreko diskoak bezala, Soraluzeko Gaztelupeko Hotsak diskoetxearekin kaleratu du bere lana.
Bederatzi piezaz osatutako diskoa da Murugarrenen azkenekoa, ohi bezala tabako keak eta graduazio altuko likoreek zipriztindutako atmosferak bildutakoa. Hainbaten ustez, orain arte atera duen diskorik “ilun eta gordinena” da. Musikalki, pop eta rockaren ertzetan mugitzen da Txuma Murugarren, baina baditu country, folk eta beste hainbat ukitu. Beraren aurretik Olatz Salvador ariko da, 23:00etatik aurrera.
Sarrerek hamar euro balio dute aurretik erosiz gero. Leihatilan hamabost euroko prezioa izango du. Honako tokietan saltzen dituzte sarrerak: Oiartzunen Amazkar tabernan eta Elorsoro kiroldegian eros daitezke, Errenteria-Oreretako Arkaitza tabernan eta Donostiako Donosti Rocken. Internet bidez ere eros daitezke sarrerak, Maukan, Ticketean, Colectivian, Oferplanen, Deskontalian eta Kutxabankeko leihatila digitalean.
