Txirrindulari gazteek 'klasika' txiki bat egingo dute hilaren 25ean

Oarsoaldea Txirrindularitza Eskolak haur eta kimu mailetako gazteentzako mendi bizikleta lasterketa egingo dute Txara mendi inguruan.

Erik Gartzia

Oiartzun

2017/02/16

OTXEko Arkaitz Iza, Unax Aduriz eta Nahia Polo txirrindulariak eta Enekoitz Markos, Kirol zinegotzia, atzoko aurkezpenean.

Oarsoaldea Txirrindularitza Eskolak (OTXE) urte batzuk daramatza eskualdeko harrobia lantzen. Bide horretan, gazteentzako mendi bizikleta proba antolatu dute hilaren 25erako. Zehazki, haur —2003 eta 2004 urteetan jaiotakoek— eta kimu (2005 eta 2006) mailetakoentzako lasterketa izango da datorren asteko larunbatean jokatuko dutena. Atzo aurkeztu zuten proba. OTXEko Arkaitz Izak zehaztu zuenez, lasterketa maila horretan “edonork har dezake parte, txirrindulari modalitateko kirol txartela izan ala ez”. Txara parkean hasi eta bukatuko da lasterketa, Frantzisko Urdinola kalean zehazki. Ibilbideak kilometro eta erdi luze izango du, eta zaharrenen kategoriak lau itzuli eman beharko dizkiote. Kimu mailakoek, berriz, bi itzuli. Izen ematea 15:30ean hasiko da, eta ordubete beranduago irteteko pistola tiroa botako dute. Lehenak ateratzen Kimu Mailakoak izango dira, eta ondoren izango da Haur Mailakoen txanda. Kategoria bakoitzeko lehenengo hiru neska eta hiru mutilei emango dizkiete, eta denek izango dute txokolate beroa dastatzeko aukera. Denentzako opariak ere egongo dira. Sari banaketa eta txokolate jatearen ondoren dutxatu nahi duenak, Elorsoro kiroldegian du aukera. Informazio gehiago edota kontakturako, OTXEren webgunean sar daiteke.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.