Euskal gehiengo sindikalak elkarretaratzea egingo du bihar goizean, Insausti garraio enpresaren parean, "lan baldintza prekarioak" gaitzesteko.
Atzo goizean izan zen lan istripua. Argazkia: Euskadiko Suhiltzaileak
Atzo goizean, 06:50 aldera, kamioilari batek lan istripua izan zuen Ikaztegieta parean. Bere kamioia irauli eta harrapatua geratu zen. Ondorioz, 58 urteko donostiarra hil egin zen.
Lan istripu hori salatzeko, ELA, LAB, ESK, Steilas, EHNE eta HIRU sindikatuek elkarretaratzea egingo dute bihar goizean, Lanbarren industriagunean dagoen Insausti garraio enpresaren parean.
Sindikatuek salatu dutenez, garraioaren sektorean ere lan baldintzak gero eta prekarioagoak dira. “Garraiolariek ez daukate giza nahiz lan gaixotasunen aurrean babes egokirik askotan, izan ere, gehiengo batean langile autonomoak baitira, edo autonomo faltsuak, eta gainera, euren lan istripuak ez dira maiz estatistika ofizialetan kontutan hartzen”, salatu du LABek. Administrazioei “beste alde batera begiratzea” leporatu diete.
Istripuek “prekarietatea eta desarautze basatia” agerian uzten dutela adierazi du LABek. “Gainera, garraiolarien eskubide eza ere nabaria da, izan ere, lana mantendu ahal izateko, askotan kargatzaileen presak, ezinezko ordutegiak, gehiegizko pisudun kargak, prezio baxuak, lan egun luzeak eta atseden eza jasan behar baitituzte. Beste askotan, gainera, zama deskargatzera behartuak dira”, gaineratu du sindikatuak. Arrazoi horiek guztiek garraiolariei lana “modu duin eta seguruan” oztopatzen dietela salatu dute.
Garraiolariaren senide eta gertukoei zein langile guztiei elkartasuna adierazi diete sindikatuek. Elkarretaratzea 11:00etan hasiko da. Euskal Herrian, aurten, lan istripuan hil den hamargarren langilea da.
Udalak bat egin du
Oiartzungo udal gobernu taldeak ere bat egin du biharko elkarretaratzearekin. Senide eta lagunei doluminak eta elkartasuna adierazi die udalak. Gainera, “garraio munduan dagoen prekarietatea” salatu nahi dute, eta langile guztientzako lan baldintza duinak eta segurtasuna bermatuta eskatu dute.
