Errigora, "inoizko uzta oparoena" banatzeko prest

Errigora egitasmoaren Uztaberria kanpaina aurkeztu dute. Kontserba loteak eta olioa eska daitezke hilaren 14ra arte, gero Laboreren egoitzan jasotzeko.

Erik Gartzia

Errenteria-Orereta,Lezo,Oiartzun,Pasaia

2017/03/07

Udaberriko kanpainaren nondik norakoak adi entzun zituzten Laboreren dendara hurbildu zirenek.

Atzo arratsaldean aurkeztu zuten Errigoraren Uztaberria kanpaina. Bertako produktuen salmentan erreferente izan nahi duen Labore kontsumo kooperatibaren denda izango denean egin zuten ekitaldia. Lagun dezente hurbildu zen udaberriko kanpainaren berri entzutera. Neguan produktu askoko loteak banatu bazituzten, orain oliba olio birjina estra eta kontserba produktuez osatutako loteak eska daitezke. Edurne Lizarazuk azaldu zuenez, iazko uzta “orain arteko oparoena” izan zen. Bai olioa baita kontserbak ere biak batera eskatu beharko dira, bakoitzak bere herriko taldean. Hilaren 14an bukatuko da eskaera egiteko epea. Produktuak jasotzea eta ordainketa epeak bereiziko dituzte. Olioa hil honen bukaeran eta apirilaren hasieran jasoko dute hala eskatzen dutenek, eta kontserbak, berriz, ekaina partean. Bi berritasun nabarmen izango ditu aurtengo kanpainak, Lizarazuk azaldu zuenez. Alde batetik, estreinakoz, produktuak modu konbentzionalean edo ekologikoan landutakoak eska daitezke. Bestetik, “gauzak errazte aldera”, Laboreren dendan (Ihurrita bidea 14, Oiartzun. Futbol zelaiaren ondoan) zentralizatuko dute olioa eta kontserba loteen banaketa. Bestalde, Laboreren denda bera hilaren 25ean —larunbata— irekiko dute.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.