Euskal Herriaren iragan gatazkatsua lantzen duen Tirabirak erakusketa zabaldu dute Merkatuzarren. Egunkarietan argitaratutako 448 bineta bildu dituzte.
Hilabetez izango da zabalik Tirabirak erakusketa. Arana, Mendoza eta Paya inaugurazioan.
erakusketa zabaldu dute Merkatuzarren. Euskal Herriaren iragan gatazkatsua lantzen du EHU Euskal Herriko Unibertsitateko EMAN taldea eta Donostia 2016ren elkarlanaren emaitza den erakusketak, eta Errenteriako Udalak udalerrira hurbildu nahi izan du.
Gatazka islatzen duten egunkarietan argitaratutako binetak bildu dituzte, eta lagin bat aukeratu ondoren, DSS2016ko Bakearen Itsasargian kokatutako erakusketa osatzeko.
Julen Mendoza alkateak, Xabi Paya Donostia 2016ko kultur programaren zuzendaria eta Edorta Arana EHUko ikertzaile eta irakasleak inauguratu zuten erakusketa atzo arratsaldean. Erakusketak iraganari buruzko begiraden aniztasuna du oinarri eta hori dela erronkarik behinena esan zuen Payak “ikuspegi anitz jasotzea kontakizun partekatuaren hazia ereiteko. Zentzu horretan, egunkari eta aldizkarietako binetek narratiba ugari ezagutzeko eta aintzat hartzeko lagungarri izan baitaitezke”.
1977 eta 2016 urte artean argitaratutako binetak jasotzen ditu. Zehazki, lau hamarkada horietan izandako 150 gertakari aukeratu eta egunkarietan aztertu dituzte.
Deia, Egin, El Diario Vasco, El Correo, ABC eta El Pais,
Diario de Navarra, El Mundo, Gara, Berria, La Razon, Diario de Noticias de Navarra, Diario 16, Ya, La Vanguardia, Enbata, Soud Ouest eta Le Journal du Pays Basquen argitaratutako tirekin osatu dute erakusketa. Bildutakoak ez dira 40 urte horietan argitaratu diren guztiak, baina erakusketara 45 marrazkilarien unibertso zabala ekarri du EMAN taldeak. Guztira 448 tira bildu dituzte erakusketa fisikoan, eta beste hainbeste
erakusketaren webgunean.
Binetez gain, artxibo interaktiboa, bineten sortzaileei egindako elkarrizketak, eta komikigintza politikoa zein umore grafikoa aztertu duten aditu, edota komunikabideetako arduradunen hitzak ikusteko aukera izango da.
Hilabetez izango da erakusketa zabalik Merkatuzarren (apirilaren 9a arte), ostegunetik igandera: Ostegun eta ostiraletan 17:30etik 20:30era; larunbatetan 11:30etik 14:30era eta 17:30etik 20:30era; eta igandetan, 11:30etik 14:30era.
