Udalak hala eskatuta, Pasaiako gazte lokalak ikertu ditu Aztikerrek; asteartean aurkeztuko dute diagnosia, Antxoko kultur etxean.
Antxoko gaztetxea izandakoan, gaur egun itxita, gazteen pintaketak.
Herriko gazteekin batera gogoeta prozesua abiatu nahi du Pasaiako Udalak, gazte lokalen gainean. Egitasmoari lehen bultzada emateko lanean hasiak dira, eta asteartean aurkeztuko duten lan horren lehen emaitza: Pasaiako gazte lokalen diagnosia eta mapaketa-ikerketa. 18:30ean izango da aurkezpena, Antxoko kultur etxean.
Aztikerrek egin du ikerketa eta enpresa berak gidatuko du hil honetan bertan abiatuko duten partaidetza prozesua. Gazte gaietan aditu Markel Ormazabal soziologoak dinamizatuko du aurkezpena, baita barrutiz barruti gazteekin batera gauzatuko den partaidetza prozesua ere.
Astearteko aurkezpenean, Pasaiako errealitatearen berri ematez gain, beste herri batzuetako esperientziak plazaratuko dituzte.
Gazte lokalak zergatik? zertarako?
Prozesuaren protagonista nagusiak, noski, gazte pasaitarrak izango dira. Beren aisialdirako erabiltzen dituzten lokalen gaineko gogoeta partekatua bultzatzea da asmoa, horregatik, gazte guztiak daude gonbidatuta, lokal erabiltzaileak direnak, ez direnak, beste lokalen esperientziak ezagutu nahi dituztenak… gazte guztiek izango dute toki.
Baina ez soilik gazteek. Gurasoak eta bizilagunak ere partaide izango dira prozesuan, baita gazte lokaletako jabeak ere, “gazte lokalak eta bizikidetza” izenburupean egingo diren saioetan, nahi baino gehiagotan gatazkatsua suertatu ohi den elkarbizitzaz gogoeta partekatua bultzatu nahi dutelako.
Parte-hartze saioak:
Gazte lokalak: zergatik eta zertarako:
Hilak 28:
- Antxo: 18:30ean, gazteekin, Gizarte Ekintzako bulegoan.
Apirilak 4
- Trintxerpe: 18:30ean, gazteekin, udal euskaltegian.
Apirilak 6
- San Pedro: 17:00, gazteekin, alkateordetzan.
Gazte lokalak eta bizikidetza
Hilak 29:
- Antxo: 18:30ean, bizilagunekin, Gizarte Ekintzako bulegoan.
Hilak 30:
- Antxo: lokaletako erabiltzaileen gurasoekin, eta lokalen jabeekin. Gizarte Ekintza bulegoan.
Apirilak 5
- Trintxerpe: Lan saioa, bizilagunekin, udal euskaltegian, 18:30ean.
Apirilak 6
- San Pedro: lan saioa, alkateordetzan, bizilagunekin, 18:30ean.
