Datorren igandean Euskal Herriko 36 udalerritan egingo dituzte herri galdeketak, tartean Oarsoaldekoetan. Bertan parte hartzera deitu dituzte herritarrak.
Igandean erabakitzera deitu dute gaur egindako agerraldian.
Datorren igandean Demoarsok antolatutako herri galdeketa egingo dute eskualdeko lau udalerrietan. Ez dira, baina, erabakitzeko eskubidea egikaritzeko aukera izango duten Euskal Herriko udalerri bakarrak izango. Astigarragan, Hernanin, Larrabetzun eta Tolosaldean ere kontsultak egingo dituzte.
Guztira 35 herrietako biztanleak izango dira igandean hautetsontziekin zita izango dutenak. Udalerri horien guztien ordezkariak bildu dira gaur Errenteria-Oreretan, Beheko kalean, datorren igandean erabakitzeko prest daudela azaltzeko.
Angel Oiarbidek eta Naroa Iturrik esan dutenez, herri galdeketak “demokraziaren festak” dira, eta igandean egongo da zer ospatua. Era berean, galdeketen seriotasuna nabarmendu nahi izan dute. “Ehunka herritarrek egindako lanean festa gutxi eta konpromiso eta inplikazio handia dago”, azaldu dute. Gainera, martxoaren 19ko galdeketek “zilegitasun, legaltasun eta berme guztiak” beteko dituztela gaineratu dute. Horretarako, Gure Esku Dagoren galdeketetako protokoloak
Ia milioi erdi herritar
Igandean egingo diren kontsulten aitzindariak gogorarazi dituzte, Etxarri-Aranatz (2013an) eta Arrankudiaga-Zollo (2014an). Eurak hasi ziren bidea urratzen, eta iaz beste 36 herrik antolatu zuten kontsulta. 2016ko kontsultetan, 150.000 biztanlek izan zuten botoa emateko aukera. “Datorren igandean beste horrenbeste herritar izango dira deituak. Uda iristerako, ia milioi erdi euskal herritar izango dira iritzia emateko aukera izango dutenak”, jakinarazi dute. Helburua dinamika, eztabaida eta praktika “Euskal Herri osora iristea” dela aipatu dute Oiarbide eta Iturrik.
Igandean 2.000 boluntario ariko dira lanean. “Hori da gure tresnarik garrantzitsuena: herritarren ahalduntzea, borondatea, anbizioa eta konpromisoa. Gure eskubideak baliatuz ahalbidetu ditugu herritarrok herritarrontzat antolatutako galdeketak”, gaineratu dute. “Tokian tokiko errealitatearen eta aniztasunaren neurriko galderak” adostu dituztela nabarmendu dute.
Euren esanetan, erabakitzea “demokrazia da, demokrazia besterik ez”. Galdeketa antolatzeko gai izatea eta erabakitzeko eskubidearen gauzatzea posible egitea “garaipen itzela” dela esan dute.
Herritar guztiak animatu dituzte igandeko herri galdeketan parte har dezaten. “Gure botoarekin, edozein dela ere, herritarron, herritar denon aldeko urrats handi bat egiteko aukera izango dugu igandean. Hautetsontziak gure zain daude eta gu prest gaude erabakitzeko! Gure esku dago!”.
