Datorren asteak kirola izango du ardatz

Kirol Astea antolatu dute bigarren aldiz, datorren asterako. Hainbat diziplina izango dituzte egunero hizpide. Kirol Saria Perico Sanromak jasoko du.

Erik Gartzia Egaña

Oiartzun

2017/03/23

Haurtzaro Atletismo Taldeko bi atleta. Sanromak 33 urte darama bertan entrenatzaile.

Bigarren urtez, Kirol Astea egingo dute Oiartzunen. Astelehenetik ostiralera, kirol bat izango dute hizpide aste horren barruan. Mendi lasterketak, surfa, kirol kazetaritza eta mendi dokumentalei buruz ariko dira gai horietan adituak. Gainera, iaz ibilbide nabarmena izan zuten kirolari oiartzuarrek ere parte hartuko dute Kirol Astean. Kirol Saria hilaren 31n banatuko dute. Periko Sanroma Haurtzaro Atletismo Taldeko sortzaile eta entrenatzaileak jasoko du sari hori. Oiartzuarrek egindako proposamenetako bat zen Sanromarena, eta herriko kirol elkarteak eta udalak osatzen duten Kirol Aholku Kontseiluak deliberatu du berari ematea. Sanromak orain dela 33 urte sortu zuen Haurtzaro Atletismo Taldea, Bixente Artola eta Alvaro Agirrerekin batera. Ordutik, modu boluntarioan lanean aritu da herrian, atletismoa sustatze aldera. Oraindik ikastolako haurrak entrenatzen jarraitzen du Sanromak. Honakoa izango da datorren asteko egitaraua:

Hilak 27, astelehena: Oihana Kortazar mendi korrikalaria. Aurkezlea: Gorka Herce (Intxixu Trail). Pleno aretoan, 19:00etatik aurrera.
Hilak 28, asteartea: Aitor Francesena: Surfa, bizimodu bat. Aurkezlea: Julen Egiguren. Pleno aretoan, 19:00etatik aurrera.
Hilak 29, asteazkena: Emakumeak kirol kazetaritzan mahai-ingurua. Dinamizatzailea: Goiatz Labandibar. Manuel Lekuona bibliotekan, 19:00.
Hilak 30, osteguna: Azken 35 urteetan mendi dokumentalen eboluzioari buruz ariko da Xabier Erro. Aurkezlea: Girizia Mendi Taldeko ordezkariak. Pleno aretoan, 19:00etatik aurrera.
Hilak 31, ostirala: Kirol Saria banatzeko ekitaldia eta Oiartzungo kirolariekin mahai-ingurua: Guruzne Azpiroz (arrauna), Julen Egiguren (surfa), Ekhiñe Rivas (txirrindularitza), Periko Sanroma (atletismoa) eta Andoni Ugalde (pilota). Dinamizatzailea: Mirari Martiarena. Pleno aretoan, 19:00etatik aurrera.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.