Oiartzungo udaleku irekiak uztailean izango dira. Bertan parte hartu nahi duten seme-alaben gurasoek apirilaren 27ra arte izango dute izena emateko epea.
Uztailean izango dira udalekuak, bi txandatan.
Uztailean izango dira, urtero bezala, Oiartzungo udaleku irekiak. Horiek antolatzeko, bertan parte hartuko duten haurrak nortzuk izango direnen izenak jaso behar dituzte udalekuen antolatzaileek. Horrela, datorren astelehenean irekiko dute izena emateko epea, eta hilabetez luzatuko da, apirilaren 27ra arte. Epez kanpoko eskaerarik onartuko ez dutela ohartarazi dute.
Euren seme-alabak udalekuetara bidali nahi dituzten gurasoek Mendiburu kaleko 5. zenbakiko bulegotik pasatu beharko dute. Astelehenetik ostiralera 08:30etik 11:30era egongo da irekita, eta arratsaldez 16:30etik 18:30era.
Udalekuak bi txandatan banatuko dituzte. Lehena uztailaren 3tik 14ra izango da, eta bigarrena hil horren 17tik 28ra. Hamabostaldi bakoitzerako prezioa 36 eurokoa izango da. Autobus zerbitzua aukeratuz gero, 49. Familia bakoitzetik hiru haurrek —edo gehiagok— izena ematen badute, %25eko deskontua izango dute.
Bi txandatan parte hartu nahi izanez gero, kuota 72 eurokoa izango da (98, autobusarekin). Familia ugarientzako deskontua berbera izango da.
Baldintzak
Haur Hezkuntzako lehenengo mailatik Lehen Hezkuntzako seigarrenera artekoek har dezakete parte. Oiartzunen erroldatuak egon beharko dute haurrek, edota Elizalden edo Haurtzaron ikasi.
Izena emateko orduan, gizarte segurantzaren txartelaren kopia, izen emate orria eta ordainagiria aurkeztu beharko dituzte gurasoek. Ordainketa Laboral Kutxaren 3035 0126 64 1260048216 kontu korrontean egin beharko da.
Oiartzungo udalekuen filosofiak sei zutabe ditu: euskara, herrigintza, parte-hartzea, hezkidetza, elkartasuna eta sormena.
Udalekuen aurretik bi bilera egingo dituzte. Lehena, haurrekin, udalekuetarako dituzten nahiak jakinarazi ditzaten. Maiatzaren 19an izango da hori, kiroldegiko bilera gelan. Bigarrena, berriz, gurasoentzako izango da, informazio praktikoarekin. Hori ekainaren 15ean izango da, pleno aretoan.
Informazio gehiago nahi duenak, Abaraxkara idatz dezake, edo 685 32 30 40 telefono zenbakira deitu.
