Bidaiatu, elkartrukatu, eta, bide batez, ikasi

Herbehereetako 22 ikasle Pasaian dira, Pasaia-Lezo Lizeoko ikasleen etxeetan, eskola trukean.

olatz mitxelena

2017/03/24

Atzo iritsi ziren ikasleak, eta astebete emango dute Pasaian.

Hemen dira Herbehereetako ikasleak. Pasaia-Lezo Lizeoko ikasturteroko klasiko bat da, arrakasta handikoa. 22 ikasle etorri dira eskola trukean Pasaiara, eta ikastolako Batxilergoko lehenengo mailako beste hainbeste ikasleren etxeetan daude. Astebete emango dute herrian. Atzo iritsi ziren eta datorren ostegunera arte (hilak 30) egongo dira, Lizeoak Roermond hiriko Bisschoppelijk College Broekhin institutuarekin elkarlanean antolatutako Eskola Trukearen 13. aldiaren barruan. Aurretik ikasle pasaitarrak izan ziren han, Herbehereetan, eta orduan ikastolako ikasleek egin antzera, orain, ikasle herbeheretarrek jarduerez beteriko egitarauaz gozatzeko aukera izango dute. Gaurko goiza, ikastola ezagutzeko baliatu dute eta arratsaldean, berriz, Donostiara joango dira, eguerdian Yola elkarten bapo bazkaldu eta gero. Bihar, aldiz, Bilbo bisitatzeko asmoa dute; eta etzi, ordea, sendi euskaldunekin igaroko dute eguna. Txangoak eta kultur jaialdia Datorren astean, badiaren inguruak ezagutuko dituzte, eta Olite edota Iruñea bisitatu. Horrez gain, arraunean aritzeko nahiz hemengo jaki goxoak dastatzeko aukera izango dute. Dena, hala ere, ez da aisialdia izango. Eskolak ere jasoko dituzte egonaldia bitartean, Lizeoko hainbat ikasle senideturen eskutik. Euskara eta Euskal Herriaren gainekoak ezagutuko dituzte. Asteazkenean (hilak 29), etxera itzultzeko bezperan, kultur jaialdia bat eskainiko du ikasle herbeheretarrek, haien kultura, hizkuntza eta ohiturei buruzkoa. Azken agurra izango da, biharamunean Roermondera itzultzeko. Egonaldiak iraun bitartean, Lizeoko ikasleek egunerokoa idatziko dute Eskola Trukearen blogean.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.