Parte hartzearekin pozik dago Oiartzungo Gure Esku Dago, baina are gehiago sortu duen giroarekin eta utzitako arrastoarekin.
M19aren aurreko lanketarekin oso pozik dago Oiartzungo Gure Esku Dago.
Bi aste pasa eta hiru egun pasatu dira Demoarsok Euskal Herriaren estatusari buruzko galdeketa egin zuenetik. Horren harira, irakurketa egin du Oiartzungo Gure Esku Dago-k. Pozik daude egun horretako emaitzekin, are gehiago aurreko hilabetetan egindako lanarekin eta galdeketak utzi duen arrastoarekin.
Alde batetik, emaitzak “izugarriak” izan zirela nabarmendu dute erabakitzeko eskubidearen aldeko taldekoek. “3.426 oiartzuarrek parte hartu zuten herri galdeketan, erroldaren %40,2. Emaitza hau ez da kasualitatea, hilabete, hilabete luzez ehunka oiartzuarrek egindako lanaren emaitza da”, esan dute. Emaitzen gainetik, egindako bideari eta Oiartzunen utzi duen “posoa” eta giroari eman diote garrantzia.
Eskualdeko gainontzeko udalerrietan parte hartzea baxuagoa izan da, baina bertako emaitzei balorea eman diete. Aitortu dutenez, horrelako kontsulta bat egitea ez da “lan erraza”. Gaineratu dutenez, hainbat herriek duten dimentsioengatik horrelako lanketa bat aurrera eramatea zailagoa da. “Sekulako lana egin ondoren emaitza onak atera dituzte eta horregatik zoriondu egiten ditugu”, zehaztu dute.
“Gizarte osasuntsua”
Oiartzungo Gure Esku Dago-ren ustez, herri galdeketak “onurak” ekarri dizkio Oiartzuni zein Oarsoaldeari. “Gizarte osasuntsu batean bizi garela erakutsi dugu, irizpide demokratiko sakonekoa eta normaltasunez demokrazia gauzatzeko gai dena. Gure garaian kokatu gaituen ariketa egin dugu, denon artean eta denontzat”, azaldu dute.
Horiek horrela, eskerrak eman dizkiete lanean aritu ziren ehunka oiartzuarrei. Hori bai, oraindik bidea egin behar dutela ziurtatu dute. “Geltoki asko geratzen zaizkigu bukaerako helburutara iristeko. Datorren geltokia ekainaren 10ean daukagu Bilbon! Bertan elkar ikusiko garelakoan!”.
Irakurketaz gain, botoa eman zuten oiartzuarren kopurua xehatu dute, adinetan banatuta. Ohartarazi dute datuak orientatiboak direla. Horiek ikusteko, egin klik estekan.
