[Galeria] Milaka lagun mende erdiaren erritmora

Larunbatean, Haurtzaro Ikastolaren 50. urteurrena ospatzeko, Oroitzapen Jaialdia antolatu zuten.

2017/05/08

Milaka pertsona gerturatu ziren larunbatean Haurtzaro Ikastolan egindako kontzertuetara.

Oiartzungo Haurtzaro Ikastola 50. urteurrena ospatzen ari da 2016-2017 ikasturtean. Larunbatean, goizeko ekitaldien ostean, tripak ondo bete eta arratsalderako Oroitzapen Jaialdia antolatu zuten, urteurrena behar bezala ospatzen jarraitzeko. Milaka lagun gerturatu ziren Oiartzunera larunbatean. Ikasleak, irakasleak, ikasle ohiak… Inork ez zuen egun handia galdu nahi izan. Berrogeita hamar urtez lanean aritu ondoren, ospatzeko unea iritsi zitzaion Haurtzarori. Eguraldia lagun, festak ez zuen etenik izan. Musika eskaintza zabala 15:30ean, herriko Etiam taldeak eman zion hasiera kontzertu sortari. Arratsaldea aurrera zihoala, Haurtzaro Ikastolako patioa ehunka lagunez betetzen joan zen, musika saioez gozatzeko prest. Kepa Junkeraren musika ekitaldia izan zen arratsaldeko bigarren kontzertua. Sorginak musikari eta dantzarien laguntzarekin, bilbotarraren ekitaldiak gerturatutakoen txalo zaparrada jaso zuen. Geroago, Xabi Solano Haurtzaroko irakaslearen Esne Beltza taldeak eskaini zuen kontzertua. Jendetsua izan zen oso, gozatzeko horietakoa. Gainera, Alaitz eta Maider oiartzuarrak entzuteko aukera izan zen, urte asko ondoren. Askorentzat hunkigarria izan zen Haurtzaroko Alaitz eta Maider ikasle ohiek –Esne Beltzarekin batera– eskainitako musika saioa. Jolastokia jendez gainezka, aho batez kantuan. Esne Beltzaren kontzertuaren ostean, Huntza talde ezagunak dantzan jarri zuen Haurtzaro, egunean hirugarrenez. 50. urteurrenaren kontzertu ekitaldiari Gozategi talde klasikoak eman zion amaiera, 22:00ak aldean. Etxeko helduek eta txikiek gozatzeko eguna izan zen larunbatekoa, beti oroimenean izango duten horietakoa. Jada 50 urte bete ditu Haurtzarok, eta oraindik betetzeko geratzen zaizkionak!

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.