Pasaia eta Red Bay senidetzeko ekitaldia egin dute gaur goizean, Albaola Itsas Faktorian. Bi udalerrietako alkateek akordioa sinatu dute.
Gomez eta Stone, senidetzearen hitzarmena sinatzen.
Pasaia eta Red Bay (Labrador, Kanada) herrien arteko lau mendeko harremana gaur ofizialdu dute. Gaurtik aurrera, Pasaia eta Red Bay herri senidetuak dira.
Senidetze hori gauzatzeko ekitaldia, Albaolan —non bestela— egin dute. Lehendabizi anfitrioi lanak egin duen Xabier Agote Albaolako presidenteak hartu du hitza. Jakinarazi duenez,
Albaola hitza bera Kanadatik etorri zitzaien. “Parcs Canadakoek artxibategietan aurkitutako euskarazko hitzak bidali zizkiguten, ea zer zen genekien. Itsasontziek albo bakoitzean zituzten hiruna pieza ziren”, argitu du Agotek.
Itsas faktoria XVI. mendean murgilduta dagoela ziurtatu Agotek: “Garai hura nolakoa zen imajinatzen dugu hemen. Baita Red Bay ere. Mende batez ehunka euskaldun izan ziren bertan, eta lotura handia dago bi herrien artean”. Orduko teknologia Euskal Herrian jaio eta Labradorrera eraman zuten, eta Red Bay da, Agoteren hitzetan, teknologia horren “kontserbatorioa”.
Gaineratu duenez, ez da egongo bi herriren arteko senidetze hain justifikaturik. “Senidetze honen ondoren, kolaborazio ugari jaioko dira. Elkarlan horrek munduko itsas mapan jartzea nahi dugu”, bukatu du, bi alkateei hitza pasatu aurretik.
“San Juan baleontziak batu gaitu”
Izaskun Gomez Pasaiako alkateak adierazi duenez, senidetzeak hainbat gauza berri sustatzea ekarriko du. Hori etorkizunari begira. “Senidetze hau egitate historikoetan oinarrituta dago, partekatua dugun historia batean. Luze itxoin diogu egun honi. Senidetzea sinbolikoa, kitzikagarria eta berezia da”, esan du.
Bi badietatik historia partekatua “balioan jarriko” dutela iragarri du Gomezek, desira batekin bukatu du interbentzioa: “Espero dut hitzarmen honek balio izatea gure kulturalak elkar ezagutzeko, eta batez ere, elkarri aitortza egiteko balio izatea”.
“Ondarea sortu nahi dugu”
Hiru bandera jarri dituzte: Ternua eta Labradorreko ofiziala, Labradorrekoa eta Kanadakoa.
Pasaiako alkatearen ondoren, Red Baykoaren txanda izan da. Wanita Stonek euskal herritarrei eskerrak eman dizkie, bere eta berekin etorri direnen izenean. “Oso hunkigarria izaten ari da bidaia. Duela 400 urte euskal marinelek egiten zuten bidaiekin alderatuta, zeharo ezberdina da”, baietsi du.
Red Bay gaur egun dena pasaitarren arbasoei esker dela ziurtatu du Stonek. “Gaur beste atal berri bat irekiko dugu gure herrien historian. Aberasgarria izango da”, baieztatu du. Horrela, Red Bayko haurrek Euskal Herria bisitatzea nahi du, baita hemengoek Labradorko toki hura bisitatzea ere.
“Bi kulturen arteko elkarlanak”, jarraitu du Stonek, “aukera gehiago emango dizkigu ondarea sortzeko”. Xabier Agoteri eskerrak eman dizkio, izan duen etorkizun senagatik. Labradorreko azentudun
Eskerrik asko batekin bukatu du hitzaldia.
Sinadura, opariak eta bertsoak
Pasaia eta Red Bayren arteko senidetze ofizialtzeko hitzarmena sinatu dute Gomezek eta Stonek. Stonek opari eman dio Gomezi: Red Bay Gizateriaren Ondare dela adierazten duten plakak, herriko emakume batek margotuta. Hiru hizkuntzatan daude plaka horiek: ingelesez, frantsesez eta —”garrantzitsuena”, Stoneren arabera— euskaraz. Gomezek zin egin dio udaletxeko toki on batean jarriko dutela.
Pin batzuk ere trukatu dituzte, tokian tokiko motiboekin. Jon Maia bertsolariak bertso sorta bat bota du (entzuteko, joan behera), San Juan baleontzia egiteko plataformatik. Kanadako bandera, Ternua eta Labrador eskualdeko bandera ofiziala eta Labradorreko propioa zituen bere azpian. Baleazaleen bizitza gogorra deskribatu ditu Jon Maiak, eta Stone zinez hunkitu du. Ekitaldia bukatzeko, hamaiketakoa egin dute, sagardoa eta Idiazabalgo gaztarekin.
