Hiru greba egun gehiago egingo dituzte Carrefourreko langileek

Hilaren 12an, 13an eta 15ean mobilizatuko dira Oiartzungo saltegi handiko langileak.

2017/05/10

Apirilean hiru greba egun egin zituzten.

Pasa den hilabetean hiru greba egun egin ondoren, Oiartzungo Carrefourreko langileek beste hiru greba egun egingo dituzte. Datorren asteburuaren bueltan izango dira saltegi handiko enpresa batzordeak deitutako greba egunak: ostiralean, larunbatean eta astelehenean. Euren lan baldintzak hobetzeko aldarriarekin jarraituko dute Lintzirinen dagoen saltegiko langileek. Saltegi handien estatuko hitzarmena sinatu ondoren, Carrefourreko langileek nabarmendu dute estatalizazio horrek prekarietatea besterik ez duela ekartzen. Gainera, grebara eraman zuten arrazoi bat bera ere ez da konpondu. Enpresa batzordea CCOO, LAB eta ELAk osatzen dute. Azken sindikatu horrek gogorarazi duenez, Carrefourrek urtean 2.351 milioiko irabaziak izan zituen. “Euskal Herrian hilean 500 eurogatik kutxazainak aldi baterako kontratatzen ari den multinazionala da”, salatu dute. Saltegi handien hitzarmena aplikatzen diete, eta Gipuzkoako elikagaigintzaren hitzarmena aplikatzen dietenekin alderatu du sindikatuak: “Carrefourreko langileek 60 ordu gehiago lan egiten dituzte urtean, eta oinarrizko soldatan 4.000 euroko aldea dago kategoria bera dutenen artean”. Antzinatasunaren plusaren erregulazio ezberdina dute, gainera. Horregatik guztiagatik, baita enpresa barruko antolaketari dagozkien gatazkengatik, hiru egun gehiago egingo dute greba. Apirileko mobilizazioak egin zituztenean ez zuten denda ireki.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.