Inoiz baino gogorrago erantzun beharko dute, hil ala biziko partidan

Zaragozaren bisita jasoko dute etzi eguerdian, eta derrigortuta daude irabaztera, mailari eusteko. Albacetek derrigorrez galdu behar du.

Erik Gartzia

Oiartzun

2017/05/19

Joaneko partidan bina berdindu zuten. Igandean zer ospatu izan nahi dute oiartzuarrek.

Oiartzun, gogor erantzun! da herriko kirol klub nagusiaren leloa. Eta etzi eguerdian, inoiz baino gogorrago erantzun beharko dute oiartzuarrek: Lehen Mailari eusteko partida erabakigarria izango da igandekoa. Karla Lekuonan jokatuko duten partidaz gain, Oiartzun Kirol Elkarteko zaleek Sevillara begiratu beharko dute. Izan ere, Betisen kontra jokatuko du bertan Fundacion Albacetek. Oiartzunek baino bi puntu gehiago dituzte, eta derrigorrez galdu behar dute Mantxakoek. Eta oiartzuarrek, berriz, irabazi behar dute. Izan ere, Albacetek berdindu eta Oiartzunek irabaziko balu (biek 21 punturekin bukatuko balute), bien arteko average-ak Albaceteri emango lioke Lehen Mailan jarraitzeko txartela. Lehen Mailari eusteko bidean, denboraldi osoan baino are eta gehiago, hamabigarren jokalariaren laguntza beharko du talde urdinak. Hori hala izan dadin bermatzeko, neurri berezia hartu du klubeko zuzendaritzak: sarrerak hiru euroan jarriko dituzte, ohiko hamar euroen ordez. 12:00etan hasiko da partida. Jokalariak igandeko partida buru-belarri prestatzen ari dira. Entrenamendu fisikoak lantzeaz gain, arlo psikologikoa ere lantzen ari dira aste honetan zehar. Partidaren aurretik, Minori Zaragozako jokalariari aitortza txikia egingo diote, joaneko partidan lesio larria izan baitzuen.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.