Adintxikikoei ez diete alkoholik salduko, eta ez dute salduko. Alternatiba gisa, scoot jaialdia antolatu dute Gaetxeko skateparkan.
Adingabeko Mahaiakoak eta antolatzaileak, gaur.
Sagardo Eguna datorren larunbatean ospatuko dute Oiartzunen. Horri begira, festaren antolatzaileek eta Adingabeko Mahaiak (udaleko Gizarte-Ongizate Sailak bultzatzen du) nerabeen artean jarrera osasuntsuak sustatuko dituztela adierazi dute.
Gaur egin dute agerraldia, eta bertan azaldu dutenez, guraso eta helduek gazteekin ohitura osasuntsuak lantzea “ezinbestekoa” da. Sagardo Eguna bezalako festetan, kontsumo arduratsua sustatzea ezinbestekoa delakoan, Sagardogileen Elkartearekin hainbat irizpide adostu ditu Adingabekoen Mahaiak.
Erabaki dutenez, Sagardo Egunean adin txikikoei ez zaie alkoholik zerbitzatuko, eta eurek ez dute alkoholik zerbitzatuko.
Gazteei alternatiba bat emateko asmoz,
scoot jaialdia antolatuko dute Gaetxeko skateparkan.
Adingabeko Mahaiaren osaketa
Adingabeko Mahaiaren helburua gazteen artean balore positiboak bultzatzea da. Nerabeekin lan egiten duten eragileek osatzen dute: Agintzari; Agipad; Elizalde Herri Eskola; Elizalde Institutua; EHU; Gizarte-Ongizate eta Gazteriako udal teknikariek eta zinegotziak; Haurtzaro Ikastola; Abaraxka eta udaltzainak.