AEBtako doinuak eta pop-rocka nahastuta, gaur, Pagoan

Gipuzkoan sortutako hiru taldek igoko dira Ergoiengo aretoko oholtzara

2017/05/26

Bihozkada taldea [Argazkia: bonberenea.com].

Ergoiengo Pagoa aretoan doinu mota ezberdinak entzuteko aukera izango da gaur gauean. Hiru taldek hartuko dute parte kontzertuan: The Frank Blackfield Band, Sin Mala Intencion eta Bi Hozkadak. Sin Mala Intencion taldearen buru da Gorka L.P. villabonarra, eta iaz atera zuten euren lehenengo lana: Esas cosas. Pop-rockaren bueltan mugitzen dira, eta euren errepertorioan beste hainbat artistaren kantak sartzen dituzte (Antonio Flores, Joaquin Sabina…). BiHozkada taldea, berriz, Nahikari Calleja anoetarrak, Tomas Lizardi alkizarrak, Oihan Agirretxe lasartearrak eta Iñaki Lizaso villabonarrak osatzen dute. Duela bi urte eman zuten lehenengo kontzertua, eta eurek ere beren burua pop-rocka etiketaren barruan sartzen dute. Azkenik, The Frank Blackfield Band taldea ere ariko da Pagoan. Donostia inguruan sortua, taldeari izena ematen dion abeslariak ibilbide luzea du musikaren munduan. Frank Blackfield Frantzian jaio zen —euskal jatorrikoa da— eta 23 urtez AEBtan bizi izan zen. Hainbat taldetan aritu da, eta egungoan country, blues eta folk doinuak uztartzen ditu. Kontzertua 22:30ean hasiko da. Hamar euro balioko ditu bertan erosiz gero, zortzi lehenago.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.